Elordada ótetin Halyqaralyq Jaıdarmanǵa Baıan-Ólgeı men Noǵaı komandasy kele jatyr
NUR-SULTAN. QazAqparat - 14 maýsymda elordada álemniń túrki tildes jastarynyń arasyndaǵy Jaıdarman festıvali ótedi, dep habarlaıdy QazAqparat tilshisi.
«Reseıden bashqurttar, noǵaılar men balqarlar keledi. Sodan keıin Mońǵolııadan Baıan-Ólgeı quramasy kele jatyr. Sonymen birge, Qaraqalpaqstan quramasy men Qyrǵyz Respýblıkasynyń oıynshylary da baq synaspaqqa elordamyzǵa shyqty. Qazaqstannan tórt qurama qatysady. Onyń ishinde Joǵarǵy lıgada oınap júrgen úsh komanda men birikken ulttar quramasy bar. Birikken ulttar quramasy ártúrli ulttardan quralǵan. Onyń ishinde ózbek, túrik, káris pen orys azamattary bar. Bári de qazaq tilinde oınaıdy», - deıdi «Jaıdarman» oıyndarynyń júrgizýshisi Esen Eleýken.
Túrki jastarynyń oıyny elordadaǵy Beıbitshilik jáne Kelisim saraıynda ótedi.
«Álemniń túrki tildes jastarynyń arasyndaǵy Jaıdarman festıvaliniń ashylýy 12 maýsymda bolady. Sol jerde kelgen quramalardyń ókilderimen aqyldasyp, ortaq lıga qurý týraly usynys tastaǵaly jatyrmyz», - deıdi Esen Eleýken.
Onyń aıtýynsha, túrki tildes halyqtardyń jastary Jaıdarman oıyndaryna zor qyzyǵýshylyq bildirip otyr.
«Festıvaldi ótkizýde qoldaý kórsetip jatqan elorda ákimdigine alǵys bildiremiz. Halyqaralyq Jaıdarmannyń ótkizilgenin estigen Halyqaralyq Túrki akademııasy da arnaıy júlde tigip, qoldaý bildirýde. Elorda men qala qonaqtarynyń bárin 14 maýsym kúni saǵat keshki 19.00-de ótetin «Jaıdarman» keshine shaqyramyz. Kirý tegin», - deıdi Esen Eleýken.
Eske sala ketsek, túrki tildes jastardyń basyn biriktergen halyqaralyq «Jaıdarman» oıyndary alǵash ret 2017 jyly ótkizildi. Ol kezde Qazaqstan komandalarymen birge, sheteldik meımandardyń qazaq tilinde óner kórsetýi kórermenderdiń zor yqylasyna ıe bolǵan. «Jaıdarman» oıynynda Óskemennen «Altaı», Qostanaıdan «Arý.kz», uıǵyr ultynyń «Laǵman.kom», Bashqurtstannyń «Ýfa» quramasy men Ózbekstan KVN-shileri, Qyrǵyz Respýblıkasynyń «Pozıtıv», Almaty oblysynyń «Jetisý», Qazaqstannyń namysyn qorǵaǵan «Qazaq jigitteri», Tatarstannyń «Qazan» quramasy men Ońtústik Qazaqstan quramasy ózara synǵa túsken edi. Bas júldeni eki jyl buryn Qyrǵyz Respýblıkasynyń «Pozıtıv» quramasy jeńip alǵan.
