Elordada ótetin Eurasia kınofestıvaline Gollıvýd juldyzdary keledi
ASTANA. QazAqparat - Aǵymdaǵy jyly EKSPO-2017 halyqaralyq kórmesi aıasynda ótetin Eurasia halyqaralyq kınofestıvaline Gollıvýd juldyzdary keledi. Bul týraly QR Mádenıet jáne sport mınıstrligi Mádenıet jáne óner departamentiniń dırektory Almaz Nurazhan málim etti, dep habarlaıdy QazAqparat.
Onyń aıtýynsha, kınofestıvalge tanymal Gollıvýd akterleri keledi. Degenmen ol naqty kimderdiń keletindigin ázirshe aıta almaıtyndyǵyn atap ótti.
«Shaqyrylǵandardyń qatarynda halyqaralyq deńgeıdegi «A» sanatyndaǵy juldyzdar bar. Biz kestelerdi qarastyrý ústindemiz. Olardy shaqyrý óte qıyn. Biraq, qazirgi ýaqytta olarmen kelissózder júrýde. Biz olardyń keletindigine senimdimiz», - dedi Almaz Nurazhan.
Uıymdastyrýshylardyń aıtýynsha, kınofestıval aıasynda baıqaý jáne konkýrstan tys baǵdarlama, ınvestorlarǵa arnalǵan kıno jobalardyń tanystyrylymy, dóńgelek ústel men sheberlik saǵattary uıymdastyrylatyn bolady.
Aıta keteıik, Eurasia kınofestıvali elimizde 1998 jyly qurylǵan bolatyn. Festıval negizinen Almaty qalasynda ótedi. Degenmen, 2008 jyly ol Astana qalasynda da bir ret ótken edi.
