Elordada ótetin aıtýly kontsertke 700 bılet tegin tabystaldy

ASTANA. QazAqparat - «Qazaqkontsert» memlekettik kontserttik uıymy elordada estrada juldyzdarynyń qatysýymen ótetin «Jeńis týy, jelbire» atty kontsertke keletin meımandarǵa 700 bıletti tegin taratty, dep habarlaıdy QazAqparat tilshisi atalmysh uıymnyń baspasóz qyzmetine silteme jasap.

Bıletter «Qazaqkontsert» MKU ujymynyń soǵys jáne tyl ardagerleri qaýymdastyǵy, Qazaqstannyń «Ardagerler uıymy», Astana qalalyq «Aýǵan soǵysy ardagerleri men múgedekteri», «Chernobyl ardagerleri», Qarttar úıi, «Sharapat» áleýmettik qyzmet ortalyǵy, Astanadaǵy «SOS balalar aýyly» jáne balalar úıiniń ókilderine berildi. 

«Jeńis kúni - halqymyzdyń erjúrektigi men tózimdiligin pash etetin, tarıh tolqynynda máńgi este qalatyn kún. Batyr babalarymyzdyń erligin ulyqtaý - urpaqqa amanat. Sol amanatty arqalaý siz ben bizdiń paryzymyz. Ózderińizge belgili, óner ordamyz halyqaralyq jáne respýblıkalyq deńgeıdegi mádenı is-sharalardy kóp ótkizedi. Buǵan qosa, bizdiń uıymda sapaly kontsertterdiń halyqqa qoljetimdigin qamtamasyz etý maqsatynda qaıyrymdylyq kontsertteri jıi ótkizilip turady. Solardyń biri - «Jeńis týy, jelbire!» kontserti», - dedi «Qazaqkontsert» MKU dırektory Jeńis Seıdollauly.

 

«Qazaqkontsert» birlestiginiń basshysy atalǵan uıymdarǵa «Jeńis týy, jelbire!» kontsertine tegin bılettermen qosa, materıaldyq kómek te kórsetiletinin aıtty.

Jeńis Seıdollauly bul qaıyrymdylyq estafetasyn ózge óner ordalaryna jalǵastyrýdy usyndy. 

Shara barysynda sondaı-aq Mádenıet jáne sport mınıstrliginiń qoldaýymen elordanyń 20 jyldyq mereıtoıyna oraı «Astana» II Dúnıejúzilik teatr festıvali ótetini atap ótildi. 

Aıta keteıik, 7 mamyr kúni saǵat 19.00-de Astana qalasyndaǵy «Qazaqstan» ortalyq kontsert zalynda  estrada juldyzdarynyń qatysýymen jáne orkestrdiń súıemeldeýimen «Jeńis týy, jelbire» atty kontsert ótedi.  Janrlyq turǵydan erekshelenetin kontsertte teatr ártisteriniń qoıylymdary kórsetiledi.