Elordada ótetin áskerı parad kezinde birqatar kóshelerdegi kólik qozǵalysy tolyqtaı shekteledi
ASTANA. 27 tamyz. QazAqparat - Qazaqstan Respýblıkasy Konstıtýtsııasynyń 16 jyldyǵyna oraı Astanadaǵy «Qazaq eli» monýmentiniń aldynda ótetin áskerı parad kezinde elorda joldaryndaǵy qaýipsizdik sharalary kúsheıtiledi.
Bul týraly qalalyq ІІD Jol polıtsııasy basqarmasynyń baspasóz qyzmeti habarlady.
30 tamyz kúni saǵat tańerteńgi 8-den is-shara aıaqtalǵanǵa deıin kóshelerdiń myna bólikteri boıynsha qozǵalys tolyqtaı toqtatylady: Abylaıhan dańǵylynan Saraıshyq kóshesine deıin Momyshuly dańǵyly boıynsha; Abylaıhan dańǵylynan Táýelsizdik dańǵylyna deıin Aınakól kóshesi boıynsha; M-1 kópirinen Táýelsizdik dańǵylyna deıin kólik qozǵalysyn Orynbor kóshesine burý arqyly R. Qoshqarbaev kóshesi boıynsha; M-3 kópirinen Táýelsizdik dańǵylyna deıin kólik qozǵalysyn Orynbor kóshesine burý arqyly Sh. Qaldaıaqov kóshesi boıynsha; Táshenov kóshesinen Sh. Qaldaıaqov kóshesine deıin Táýelsizdik dańǵyly boıynsha.
Paradty tamashalaý úshin kórermender B.Momyshuly dańǵyly jaǵynan Táýelsizdik kóshesi boıynsha jáne B.Momyshuly dańǵyly jaǵynan R.Qoshqarbaev kóshesi boıynsha kirgiziledi.
Osyǵan baılanysty Astana jol polıtsııasy basqarmasy elordanyń turǵyndary men qonaqtaryn ózderine tıimdi baǵytyn aldyn ala tańdap, qoǵamdyq kólikterge kedergi keltirmes úshin jeke kólikpen kelmeýlerin ótinedi.
