Elordada ótetin Almaty kúnderinde kóptegen mádenı sharalar uıymdastyrylady
ASTANA. QazAqparat - Astana qalasyndaǵy Almaty kúnderi aıasynda birqatar mádenı is-sharalar uıymdastyrý josparlanǵan, dep habarlaıdy Almaty ákimdiginiń baspasóz qyzmeti.
5 qarashada saǵat 11.00-de QR Ulttyq mýzeıinde «Almaty - Táýelsizdiktiń altyn besigi» mýltımedııalyq kórmesi men Almaty týraly fotokórmeniń ashylýy ótedi. Onda Almaty tarıh mýzeıi qorynan eksponattar usynylady. Kórmeniń mýltımedııalyq kontentin Jetisýǵa jáne kóne dáýirden osy ýaqytqa deıingi kezeńdi qamtıtyn alǵashqy qazaqstandyq megapolıske arnalǵan biregeı tarıhı sýretter quraıdy. Sondaı-aq kórmege Almaty qalasy boıynsha 3D týr usynylady. Astana qonaqtary men turǵyndary qalanyń tanymal, mádenı, mańyzdy nysandarymen tanysa alady. Kórme 2016 jylǵy 5 jeltoqsanǵa deıin jalǵasady.
5 jáne 6 qarashada Almaty qalasy Mádenıet jáne muraǵattar basqarmasynyń Memlekettik qýyrshaq teatry Astana qalasynyń Q.Qýanyshbaev atyndaǵy Memlekettik akademııalyq qazaq mýzykalyq dramalyq teatrynyń sahnasynda «Altyn Adam» ańyz spektakliniń qoıylymyn, sondaı-aq «Qýyrshaqtar shoýy» merekelik spektaklin uıymdastyrady. Teatrdyń foıesinde eki kún boıy teatr uıymdastyrǵan «Qýyrshaqtar kórmesi» ótedi.
5 qarasha saǵat 15.00-de Ulttyq kitaphanada Astana qalasynyń jastarymen tanymal qazirgi aqyndardyń kezdesýi ótedi: Ǵalym Jaılybaı, Maraltaı Ybyraev, Qasymhan Begmanov, Janarbek Áshimjanov jáne t.b.
Dál osy kúni saǵat 18.00-de Qazaqstan Respýblıkasy Táýelsizdiginiń 25-jyldyǵyna arnalǵan, Almaty qalasy ákiminiń Estrada-sımfonııalyq orkestri men qazaqstan estradasy juldyzdarynyń qatysýymen «Almaty - Táýelsizdiktiń altyn besigi» atty gala-kontsert ótedi. Kontsertke Aıqyn Tólepbergenov, Lýına, Dımash Qudaıbergenov, Dıana Sharapova, Álı Oqapov, «Muzart», «Qońyr», «KeshıÝ» «Jigitter», «Saryn» jáne «Rıngo» toptary qatysady.
6 qarasha saǵat 15.00-de Beıbitshilik jáne kelisim saraıynda «Sazgen Sazy» folklorlyq-etnografııalyq ansambli men Nurjan Janpeıisov, Talǵat Ábýǵazy, Aıgúl Qosanova, Sholpan Darjanova, Uljan Baıbosynova, Tileýles Qurmanǵalıev sekildi tanymal dástúrli óner oryndaýshylarynyń qatysýymen «Máńgilik murat» atty dástúrli mýzyka kontserti ótedi.
