Elordada otbasylyq janjal boıynsha 7500 qorǵaý nusqamasy qoldanyldy
NUR-SULTAN. QazAqparat – Kóp adam qorǵaý nusqamasynyń bar ekenin bilmeıdi. Bul týraly Antikor.live jobasynda Nur-Sultan polıtsııa departamenti jergilikti polıtsııa qyzmeti basqarmasy áıelderdi zorlyq-zombylyqtan qorǵaý bólimshesiniń aǵa ınspektory Gúlmıra Shrahmetova, dep habarlaıdy QazAqparat tilshisi.
«Qabyldanyp jatqan sharalarǵa qaramastan bıyl otbasylyq, turmystyq saladaǵy qylmystyń sany artty. Buǵan karantın keri áserin tıgizdi. Pandemııa jaǵdaıynda halyqtyń ómir salty túbegeıli ózgerdi. Áleýmettik baılanystardyń tómendeýi, qarjylyq jaǵdaıdyń nasharlaýy, adamdardyń psıhologııalyq jaǵdaıda teris áser etýi, ishimdik ishý saldarynan otbasylyq jáne tulǵaaralyq qaqtyǵys kóbeıdi», - deıdi Nur-Sultan polıtsııa departamenti jergilikti polıtsııa qyzmeti basqarmasy áıelderdi zorlyq-zombylyqtan qorǵaý bólimshesiniń aǵa ınspektory Gúlmıra Shrahmetova.
Onyń aıtýynsha, esepke alynǵan otbasylyq janjalǵa qatysty 7500-den astam qorǵaý nusqamasy shyqty.
«Kóp adam qorǵaý nusqamasynyń bar ekenin bilmeıdi. Bul kádimgideı tejeýish faktor retinde qarastyrylady. Mysaly, polıtsııa departamentiniń qyzmetine júgingen adamdar osy qorǵaý nusqamasynyń qanshalyqty tıimdi ekenin aıtyp jatady. Qorǵaý nusqamasy boıynsha quqyq buzýshy sizge 30 táýlik ishinde sizge qatysty qandaı da bir qylmys jasamaýy kerek. Osy 30 táýlik ishinde ýchaskelik polıtsııa ınspektory agressorǵa qatysty profılaktıkalyq jumys jasaıdy. Karantınge baılanysty quqyq buzýshynyń áreketi beınebaqylaý arqyly da baqylanyp otyrady. Beınebaılanys arqyly shyǵýǵa múmkindik bolmasa, tikeleı mekenjaıǵa baryp, sol jerde profılaktıkalyq jumys jasalady», - deıdi ol.
