Elordada otbasy máselelerine arnalǵan halyqaralyq jıyn ótip jatyr

ASTANA. QazAqparat – Elordada Otbasy, demografııa jáne genderlik saıasat máseleleri jónindegi halyqaralyq ǵylymı konferentsııa ótip jatyr. Іs-shara eki kúnge sozylady, dep habarlaıdy QazAqparat tilshisi.

«Búgingi jıynǵa elimizdegi otbasy ınstıtýty salasynda eńbek etip júrgen belgili sarapshylar, saıası jáne qoǵam qaıratkerleri, memlekettik organdardyń ókilderi, úkimettik emes uıymdardyń jetekshileri men músheleri qatysyp otyr. Sondaı-aq alys-jaqyn shet elderden kelgen arnaıy mamandar da osynda. Atap aıtqanda, BUU ókili, Chehııa, Shvetsııa, Úndistan men AQSh-tan adam quqyqtary jónindegi sarapshylar da kelgen. Sondyqtan osy is-shara aıasynda elimizdiń mamandary sheteldik áriptesterimen ózara pikir almasyp, genderlik saıasat, áıelderdiń quqyǵy, balalardyń múddesi taqyrybynda nátıjeli tájirıbemen bólisedi dep senemin», - dedi konferentsııada sóz sóılegen QR Prezıdenti Ákimshiligi basshysynyń orynbasary Aıda Balaeva.

Ol elimizdegi otbasy ınstıtýtynyń óz damý tarıhy bar ekendigin basa aıtty. «Qalyptasqan joly bar jáne aıqyn salalardyń biri. Halqymyz ulttyq tárbıe men salt-dástúr normalary arqyly otbasy qundylyqtaryn urpaqtan urpaqqa jetkizip otyrǵan. Bul – ǵasyrdan ǵasyrǵa ótip, ýaqytpen birge synalyp, halyqtyń sanasyna ábden sińirgen rýhanı ónegelerdiń jıyntyǵy. Dese de, búgingi jahandaný úrdisine saı jan-jaqtan úırený qazirgi zamannyń talaby. Ásirese, Qazaqstannyń damýdyń jańa kezeńine aıaq basatyn shaǵynda ǵylymı tásilderdi zerdelep, sarapshylardyń oı-pikirlerin qulaq asý mańyzdy», - dedi ol.

Aıda Balaeva is-shara qatysýshylaryna oı-pikirlerin ortaǵa salýdy ótindi.

«Osynda aıtylǵan árbir usynys pen pikir eskerýsiz qalmaıdy dep kepil beremin. Onyń qorytyndysy boıynsha arnaýly qarar qabyldanady. Al ulttyq komıssııa atalǵan qarar negizindegi usynystardyń barlyǵyn aldaǵy jumysynda basshylyqqa alatyn bolady», - dedi QR Prezıdenti Ákimshiligi basshysynyń orynbasary.