Elordada otbasylyq formattaǵy ekologııalyq senbilik uıymdastyryldy
ASTANA. KAZINFORM — Astanada E. Rahmadıev atyndaǵy Memlekettik akademııalyq fılarmonııanyń qyzmetkerleri men ónerpazdary januıalarynyń qatysýymen EcoFamily ekologııalyq-tanymdyq otbasylyq is-sharasy ótti, dep habarlaıdy elorda ákimdiginiń resmı saıty.
Tabıǵatqa janashyrlyq pen otbasylyq birlikti ushtastyrǵan is-shara elordanyń ekologııalyq mádenıetin arttyrýǵa baǵyttaldy. EcoFamily otbasylyq senbiligi aıasynda fılarmonııa ujymy men qyzmetkerlerdiń jaqyndary birlesip senbilik ótkizip, qorshaǵan ortany tazartý jumysyna qatysty. Іs-shara barysynda qatysýshylar aýmaqty qoqystan tazartyp, tabıǵatty qorǵaý isine óz úlesterin qosty. Sonymen qatar shara ujymdyq birlikti nyǵaıtyp, otbasylyq qundylyqtardy dáripteýge múmkindik berdi.
— Tazalyq otbasydan bastalady deıdi ǵoı. Astanamyz shaǵyn otbasydaı, sondyqtan da elordamyzǵa úlken qurmetpen qaraımyz. «Tazalyq – tazalaǵan jerde emes, taza ustaǵan jerde» deıdi ǵoı. Sol sebepti qalamyzdy taza ustap, osyndaı is-sharalarǵa jıi qatysyp, atsalysyp, ózimizdiń qalamyzǵa degen qurmetimizdi bildirip júreıik, — dep atap ótti E.Rahmadıev atyndaǵy Memlekettik akademııalyq fılarmonııanyń halyq án bóliminiń ánshisi, mádenıet salasynyń úzdigi, «Qurmet» ordeniniń ıegeri Nuraı Tanabaev.
Qazaqstannyń eńbek sińirgen ártisi, «Parasat» jáne «Qurmet» ordenderiniń ıegeri Maıra Іlııasova ekologııalyq bastamaǵa qoldaý bildirip, tazalyq mádenıetin urpaq tárbıesimen baılanystyratynyn atap ótti.
— Búgingi bizdiń senbilik erekshe. Óıtkeni bul – EcoFamily otbasylyq senbiligi. Osy oraıda nemerem Aısamııany senbilikke ákeldim. Jalpy, tazalyq úıden bastalady. Kishkentaı balalarymyzǵa bári tazalyq saqtaýdy úıretý qajet dep esepteımin. Fılarmonııanyń bir top qyz-jigitteri kishkentaı sábılerine deıin ákelip, óte tamasha senbilik ótti, — deıdi ánshi Maıra Іlııasova.
Senbilikke 40-tan astam adam qatysyp, qorshaǵan ortany taza ustaý isine óz úlesterin qosty. Otbasylyq formatta ótken senbilik ekologııalyq mádenıetti qalyptastyrý men qoǵamdaǵy jaýapkershilik qundylyqtaryn nasıhattaýǵa baǵyttaldy.
Buǵan deıin myńdaǵan aqmolalyq «Taza Qazaqstan» ekologııalyq marafonyna qatysqanyn jazǵanbyz.
