Elordada orys jazýshysy, dramatýrg Anton Chehovtyń 150 jyldyq mereıtoıyna arnalǵan kitap kórmesi men ádebı kesh ótti

Álemge áıgili klassıkalyq týyndylarda nasıhattaý, Qazaqstan men Reseı arasyndaǵy mádenı jáne ǵylymı baılanystardy arttyrý maqsatynda «Máńgi jandy klassıka» degen taqyryppen uıymdastyrylǵan kórmede qalamgerdiń ár jyldary jaryq kórgen kitaptary qoıylǵan. «Máselen, atalǵan ortalyq kitaphanasynyń sırek qoljazbalar qorynan alynǵan keıbir kitaptardyń jaryq kórgen ýaqyty 1903, 1893 jyldarǵa sáıkes keledi», deıdi kitaphana qyzmetkeri Aınagúl Sadyqova.

Jalpy kórmege qalamgerdiń 100-ge jýyq kitabymen qatar ol týraly jazylǵan eńbekter de qoıylǵan. Olardyń qatarynan jazýshynyń ómirine arnalǵan London ýnıversıtetiniń professory Donald Reıfeldiń kitabyn, Chehovty jazýshy retinde emes, bilikti dáriger retinde sýrettegen basylymdy kórýge bolady.

A.Chehovtyń qazaq tiline aýdarylǵan alǵashqy týyndysy «Uzaq» áńgimesiniń 1911-1915 jyldary Troıtsskide jaryq kórgen «Aıqap» jýrnalynda jarııalanǵanyn atap ótken L.Gýmılev atyndaǵy Eýrazııa ulttyq ýnıversıtetiniń dotsenti Janna Nurmanovanyń aıtýynsha, «Qyrǵyzdar» atty áńgimesi jazýshylyqty endi bastap júrgen onyń qazaq jurtshylyǵyna qyzyǵýshylyǵynyń bolǵandyǵyn dáleldeı túsedi.

«Chehovtyń qazaq ádebıetine yqpaly degende eki jazýshyny ataýǵa bolady. Olar Beıimbet Maılın men Muhtar Áýezov. B.Maılın qalamgerler arasynda «Qazaqtyń Chehovy» dep te atalǵan. Onyń «Shuǵanyń belgisi» atty shyǵarmasy orys jazýshysynyń áńgimeleri jelisi negizinde jazylǵanyn baıqaýǵa bolady», deıdi ol.