Elordada órtke oranǵan úıdegi eki bala qutqaryldy
NUR-SULTAN. QazAqparat – Elordada órtke oranǵan úıdiń turǵyndary qutqaryldy, dep habarlaıdy QazAqparat.
«21 mamyr kúni saǵat 06:23-de Sarjaılaý kóshesindegi órt týraly habarlama kelip tústi. Nur-Sultan qalasy TJD-niń órt sóndirýshileri kelgen kezde, jalpy aýdany 110 sharshy metr mansard túrindegi jeke úıdiń shatyry men úıdiń kireberisi janyp jatqany belgili boldy. Qyzyl jalyn aýyzdyqtaldy. Qurban bolǵandar men zardap shekkender joq. Qazir órttiń sebebi anyqtalýda», - delingen Nur-Sultan qalasy TJD baspasóz qyzmetiniń málimetinde.
Belgili bolǵandaı, úıde eki kishkentaı balasy bar otbasy turady. Órt sóndirý bólimsheleri kelgenge deıin, otaǵasy bala-shaǵasyn esik arqyly shyǵarýǵa tyrysqan. Biraq jalyn kireberisti sharpyǵandyqtan, esikke jaqyndaýǵa múmkindik bolmady. Osydan keıin ol balalardy tereze arqyly túsirýge talpynǵan. Osy ýaqytta kóshede ketip bara jatqan er adam otqa orynǵan úıdi baıqap, kómek qolyn sozdy. Ol áıeli men balalaryn terezeden syrtqa shyǵarýǵa tyrysyp jatqan otaǵasyna kómektesti.
«Otbasy múshelerin qutqarýǵa kómektesken 34 jasar Qanat Baıbolov esimdi azamat bolyp shyqty. Qanat qaýip týraly oılamaı, kishkentaı balalardy qutqarýǵa kómek kórsetti. Barlyq otbasy músheleri aman-esen qutqaryldy», - delingen departament habarlamasynda.
