Elordada Ortalyq Azııadaǵy eń iri pop-mádenıet festıvali bastaldy
ASTANA. KAZINFORM – Búgin elordada Ortalyq Azııadaǵy eń iri pop-mádenıet festıvali – Comic Con Astana 2026 bastaldy. Festıval 6-9 tamyz aralyǵynda Barys Arena men «Alaý» muz saraıynda ótip jatyr.
Festıvaldiń bas prodıýseri Natalıa Abrashkınanyń aıtýynsha, Comic Con Astana jyl saıyn aýqymyn keńeıtip keledi.
- Jyl saıyn seriktesterimizdiń de, kelýshilerimizdiń de sany artyp keledi. Festıval ótetin alańdar da kóbeıdi. Bizdiń basty maqsatymyz – ár otbasy ózine qyzyqty dúnıe taýyp, bul is-sharaǵa jyl saıyn kelgisi keletindeı atmosfera qalyptastyrý, – dedi ol.
Bıyl festıval alǵash ret birden eki nysanda uıymdastyrylyp otyr.
Festıvaldegi basty is-sharalardyń biri – halyqaralyq kospleı baıqaýy. Bıyl onyń júlde qory 20 mln teńge.
Baıqaýǵa qatysýshylar tanymal fılmder, serıaldar, anıme, komıks jáne kompıýterlik oıyn keıipkerleriniń beınesin somdaıdy.
- Kospleı baıqaýyna 20-dan astam elden ótinim tústi. Alaıda olardyń barlyǵy irikteýden óte almady. Ótinimder sany biz qabyldaı alatyn qatysýshylar sanynan shamamen segiz ese kóp boldy. Sondyqtan irikteý birneshe kezeń boıynsha óte qatań túrde ótti. Nátıjesinde 180 qatysýshyny tańdadyq, – dedi Natalıa Abrashkına.
Uıymdastyrýshylardyń boljamynsha, festıvalge tórt kún ishinde shamamen 100 myń adam qatysady dep josparlanyp otyr.
- Qazir shetelden keletin qonaqtardyń naqty sanyn eseptep jatyrmyz. Ázirge boljam boıynsha, tórt kún ishinde festıvalge shamamen 100 myń adam keledi. Bıletter áli de satylyp jatyr. Sondyqtan tórtinshi kúnniń sońyna qaraı kelýshiler sany budan da kóp bolýy múmkin, – dedi bas prodıýser.
Onyń aıtýynsha, bıyl festıval baǵdarlamasy otbasylyq demalysqa da beıimdelgen.
Munda kishkentaı balalarǵa arnalǵan oıyn aımaqtary, úlken geımıng alańdary jumys isteıdi. Sondaı-aq bıyl festıvalge qatysatyn blogerler sany da artqan.
Aıta keteıik, buǵan deıin elimizde tamyz aıynda bes iri festıval ótetini habarlanǵan edi.
