Elordada ortalyq atqarýshy organdardyń jumys ýaqyty ózgerýi múmkin

ASTANA. KAZINFORM — Astana qalasy ákimdiginde jumys ýaqytyn ózgertý máselesi kóterildi.

Qalalyq máslıhattyń kezekti sessııasynda Astana qalasynyń kólik júıesin damytý perspektıvalary qaraldy. 

— Búginde biz qarastyryp jatqan taǵy bir másele, jumys ýaqytyn ózgertý. 2017 jyldan bastap ákimdiktiń jumys ýaqyty tańǵy saǵat 08:30–ǵa aýystyrylǵan. Osy oraıda ortalyq atqarýshy organdardyń jumys ýaqytyn ózgertý máselesin Úkimet deńgeıinde kóterýdi josparlap otyrmyz. Ózgeris jarty saǵatqa ma, bir saǵatqa ol máseleni biz áli talqylaımyz. Bul máseleni bilim berý jáne densaýlyq saqtaý nysandarymen birlese qarastyramyz, — dedi elorda ákiminiń orynbasary Ersin Ótebaev qalalyq máslıhat otyrysynda baıandama jasap.

Elorda ákimi orynbasarynyń ýájine súıensek, jumys ýaqytyn ózgertý sharasy jolaýshylar aǵynyn azaıtýǵa septigin tıgizedi, sáıkesinshe keptelis máselesi sálde bolsa sheshimin tappaq. 

— Qoǵamdyq kólikti paıdalanatyn ár jolaýshy jumysqa jarty saǵat erte shyǵýǵa týra keledi, al júrgizýshiler de sáıkesinshe qozǵalysty rettep, jol qozǵalysyn birqalypty etýge múmkindik alady. Alaıda máseleni áli de jan-jaqty pysyqtaý qajet, sizdermen birlesip talqylap, tıimdi sheshim qabyldaımyz. Bul eń jyldam jáne oń ózgeristerdiń biri bolatynyna senimdimiz, — deıdi ol.

Aıta ketsek, Memleket basshysy taıaýda ótken ulttyq quryltaıda ýaqyt beldeýine qatysty pikirtalasty doǵarý qajettigin aıtty. 

Eske sala keteıik, Shyǵys Qazaqstan oblysyndaǵy Katonqaraǵaı aýdanynda jumys ýaqyty bir saǵatqa keri shegerildi. 

Keıin Shyǵys Qazaqstannyń taǵy tórt aýdanynda jumys ýaqyty bir saǵatqa keri shegerildi.