Elordada órt oqıǵalarynyń sany azaıdy
ASTANA. QazAqparat - Jyl basynan beri on aıdyń ishinde Astana qalasynda 564 órt oqıǵasy tirkeldi. Bul ótken jyldyń sáıkes kezeńindegi kórsetkishten 3,4%-ǵa kem dep habarlaıdy, elorda ákimdiginiń medıa ortalyǵy.
Búgin «Jylytý maýsymynyń órt qaýipsizdigi erejelerin saqtaý» taqyrybyna arnalǵan baspasóz máslıhaty barysynda órt oqıǵalary negizinen jeke turǵyn úı sektorlarynan shyǵatyny aıtyldy.
«2016 jyly órt saldarynan 2016 jyly 16, bıyl 9 adam (úsheýi - balalar) qaza tapqan. On aıda 68 adam zardap shekken. Órt oqıǵalary kóbine jeke turǵyn úı sektorynda bolady. Turǵyn úılerdegi órttiń negizgi bóligi jer turǵyn úı sektoryna tıesili. Dálirek aıtqanda, órt oqıǵalarynyń jalpy sanynyń 54,4%-yn quraıdy», - dedi Órt qaýipsizdigi salasyndaǵy baqylaý jáne profılaktıkalyq qyzmet basqarmasynyń bas mamany Murat Madybekov.
Onyń derekterine qaraǵanda, Qazaqstannyń bas qalasynda ótken jylmen salystyrǵanda gazdan ýlaný oqıǵalarynyń da sany 27, 6% -ǵa azaıǵan.
Órt oqıǵalarynyń sanyn azaıtý, olardy boldyrmaý maqsatynda Astana qalasy TJ departamentiniń qyzmetkerleri jeke turǵyn úı sektoryndaǵy aýlalardy aralap, reıd, úgit-nasıhat jumystaryn júrgizip jatyr.
Tótenshe jaǵdaılardyń aldyn alý bóliminiń bastyǵy Erkin Otarǵalymnyń aıtýynsha, tótenshe jaǵdaılar departamenti qyzmetkerleri jyl basynan jeke turǵyn úı sektoryndaǵy 39 925 aýlany aralaǵan.
«Turǵyndarmen 290 kezdesý ótkizdik. Atalmysh jınalystarǵa barlyǵy 6204 adam qatysqan bolatyn. 3431 adam qatysqan 327 nusqaýlyq sharasy, 9286 adamnyń qatysqan 359 shara ótti. Turǵyndarǵa órt qaýipsizdigi erejeleri jazylǵan jadynamalar taratyldy. Departament júrgizip jatqan jumystar esepke alyna otyryp, tabıǵı jáne tehnogendik tótenshe jaǵdaılardyń sanyn azaıtýǵa baǵyttalǵan barlyq qajetti sharalar aldaǵy ýaqytta da qabyldanatyn bolady», - dep túıindedi sózin Erkin Otarǵalym.
