Elordada órt qaýipsizdigi turaqty baqylaýda
ASTANA. 12 qańtar. QazAqparat - Astana qalalyq tótenshe jaǵdaılar departamentiniń Órt baqylaý basqarmasy 2012 jyldyń 11 aıynda qaladaǵy 4429 nysanǵa tekserý júrgizdi,
dep málimdedi atalǵan vedomstvo bastyǵynyń orynbasary Beıbit Sydyqov Astana qalasynyń resmı saıtyna.
Tekserý nátıjesinde 1155 nysannyń órtke qaýiptiligi joǵary, 1354-i orta jáne 1920-si shaǵyn dárejede ekendigi anyqtaldy. Vedomstvonyń málimeti boıynsha, qala tirshiligin qamtamasyz etetin nysandardyń jaǵdaıy qys kezeńinde turaqty baqylaýda bolady. Kez kelgen ǵımarat órt shyqqan jaǵdaıda turǵyndardyń óz betimen órtti sóndirýi úshin quraldarmen jabdyqtalýy tıis. Órt-tehnıkalyq tekserýdiń qorytyndysynda 2031 zańdy, laýazymdy jáne jeke tulǵa ákimshilik jaýapkershilikke tartylyp, 16 mln. 81 myń teńge aıyppul salyndy.
