Elordada ornatylǵan eskertkishterdiń barlyǵy jastardyń tarıhı sanasyn myǵymdaı túsýi shart - N. Nazarbaev
aýsymnyń 1-i. QazAqparat /Qanat Mámetqazyuly/ - Elordada ornatylǵan eskertkishterdiń barlyǵy jastardyń patrıottyq sezimin, Otanǵa degen súıispenshiligin qalyptastyryp, tarıhı sanasyn myǵymdaı túsýi shart. Búgin QR Prezıdenti Nursultan Nazarbaev Kereı men Jánibek handardyń monýmentaldy músindik-kórkem kompozıtsııasyn ashý rásiminde sóılegen sózinde osylaı dedi.
«15-ǵasyrdyń ekinshi jartysynda bizdiń babalarymyz Kereı men Jánibek handar kótergen týdyń astyna jınalyp, tarıhta tuńǵysh ret ózindik derbes memleket - Qazaq handyǵyn qurdy. Dál osy kezeńde halyqtyń ózindik sana-sezimi qalyptasyp, qazaqtardyń basqadan erekshelenip turatyn erkindik súıgish minezi aıshyqtala tústi. Biz, uly babalarymyzdyń qaldyrǵan murasyn eshqashan esten shyǵarmaı, qadirleımiz. Biz, Qazaq memlekettiginiń negizin qalaýshy Kereı men Jánibektiń halqymyzdyń asyl tarıhyna qosqan úlesterin joǵary baǵalaımyz. Sondyqtan da, biz búgingi ulttyń uly tulǵalaryna máńgilik eskertkish ornatýymyz tarıhty qasterlep, qadir tutqan urpaq qurmetiniń belgisi bolyp tabylady», dedi N. Nazarbaev.
Sonymen birge, qazirgi Qazaqstan óz memlekettigin nyǵaıtyp jatqanyna toqtalǵan Elbasy, elimizde ekonomıka jyldan-jylǵa damyp otyrǵanyn, Qazaqstannyń halyqaralyq moıyndalýy keńeıe túskenin jetkizdi. Memleket basshysynyń aıtýynsha, Qazaqstannyń barlyq saladaǵy negizgi, buǵan deıingi jáne bolashaqtaǵy jetistigi qoǵam birligi men dostyǵy bolyp tabylady.
«Eýrazııanyń aýqymdy dalalyq keńistiginiń dál kindiginde ornalasqan Astana ósip, órkendeı túsýde. Biz babalarymyz bastap ketken uly jasampaz mıssııany jalǵastyratyn bolamyz. Búgingi kúni Qazaqstan óńirdegi, jahandaǵy qaýipsizdiktiń nyǵaıýynda mańyzdy ról atqaryp keledi. Elimizdiń tyńnan jasalǵan beıbit bastamalary álemdik qaýymdastyq tarapynan da qoldaý tabýda. Bıyl bedeldi EQYU-na tóraǵalyq etýdemiz, kelesi jyly Islam memleketteri uıymynyń tóraǵalyǵyn qolymyzǵa alamyz. Qazaq jeri konfessııaaralyq dıalog alańyna aınalǵan kıeli oryn sanalýda. Bizdiń qoǵam arasyndaǵy kelisim men ózara baılanys baǵytyndaǵy tájirıbemiz de álem elderi tarapynan bıik qyzyǵýshylyqtarǵa ulasyp otyr», dedi N. Nazarbaev.
Sonymen birge, Prezıdent qazirgi elorda jańa sáýlet úlgilerimen erekshelene túsip otyrǵanyn aıta kele, monýmentaldy ónerdegi erekshe oryn tarıhı tulǵalarǵa arnalǵan eskertkishterge tıesili ekendigin jetkizdi. Sondaı-aq, Memleket basshysy Astanada buǵan deıin Kenesary han men qazaqtyń ataqty úsh bıine eskertkishter, basqa da monýmentter turǵyzylǵanyn aıtty. «Bulardyń barlyǵy azamattardyń, ásirese jastardyń patrıottyq sezimin, Otanǵa degen súıispenshiligin qalyptastyrýy kerek, bizdiń tarıhı sanamyzdy myǵymdaı túsýi shart. Kez kelgen memlekettiń astanasynyń atqaratyn negizgi róli de osyndaı dúnıeler», dedi Elbasy.
