Elordada ornatylǵan batýttardyń sany belgisiz - ákimdik
NUR-SULTAN. QazAqparat - Elordadaǵy oıyn attraktsıondarynyń kóp bóligi jeke nysandardyń aýmaǵynda ornatylǵan. Bul týraly QazAqparat tilshisi Nur-Sultan qalalyq ınvestıtsııalar jáne kásipkerlikti damytý basqarmasyna silteme jasap habarlaıdy.
«Kásipkerlerdiń júzege asyratyn qyzmeti týraly esep berilmeýine baılanysty Nur-Sultan kóshelerinde ornatylǵan batýttardyń sany basqarmaǵa belgisiz. Sonymen qatar, oıyn attraktsıondarynyń basym bóligi jeke nysandardyń aýmaǵynda ornalasqan. Tıisinshe basqarmanyń qyzmetkerleri osy nysandardy teksere almaıdy», - delingen basqarmanyń QazAqparat tilshisine bergen jaýabynda.
Batýttardyń qaýipsizdigine baılanysty suraqqa jaýap bere kele basqarma ókilderi qadaǵalaý quzyreti ózinde joq ekenin habarlaıdy. Osyǵan baılanysty kásipkerlerge basqarma tekserý júrgize almaıdy.
«Osy másele boıynsha ýákiletti organ - QR Indýstrııa jáne ınfraqurylymdyq damý mınıstrliginiń Indýstrııalyq damý jáne ónerkásiptik qaýipsizdik komıteti. Sondaı-aq, osy baǵyttaǵy jumysty Tótenshe jaǵdaılar, polıtsııa, qoǵamdyq densaýlyq saqtaý departamentteri jáne Energetıka mınıstrliginiń Atomdyq jáne energetıkalyq qadaǵalaý men baqylaý komıtetiniń Nur-Sultan qalasy boıynsha aýmaqtyq departamenti júrgizedi», - delingen jaýapta.
Búgingi kúni basqarmanyń mıssııasy - kásipker men memleket arasyndaǵy ákimshilik kedergilerdi joıýǵa yqpal etý bolyp otyr.
«Zań boıynsha qandaı da bir sharalardy qoldanýǵa ókilettigimiz joq. Tek qana usynys beremiz», - deıdi basqarma qyzmetkerleri.
Aıta ketsek, buǵan deıin Nur-Sultan qalasynyń ákimdigi TJD jáne aýdandyq ákimdikterimen birlese otyryp, balalardyń jaraqattaný jáne ólim-jitim oqıǵalarynyń kóbeıýine baılanysty úrlemeli batýttardyń jumysyn ýaqytsha toqtatýǵa baǵyttalǵan sharalardy qolǵa alǵan bolatyn.
Eske salaıyq, 25 mamyr kúni Qaraǵandy qalasyndaǵy Ortalyq saıabaqta qatty jelden úrlemeli batýt jaqynda ornalasqan dúńgirshektiń ústine aýdarylyp túsken bolatyn. Saldarynan 2007 jyly týǵan jetkinshek qaza boldy. 2004 jáne 2012 jyly týǵan úsh bala túrli jaraqatpen aýrýhanaǵa jetkizildi. Oqıǵaǵa baılanysty qylmystyq is qozǵaldy.
Saýyq nysanyn zańsyz ári, talapqa saı ornalastyrmaǵany úshin qalanyń 40 jastaǵy turǵyny ustalyp, ýaqytsha ustaý ızolıatoryna qamaldy.
Búgin belgili bolǵandaı, aýdarylǵan batýttyń qojaıyny Qaraǵandy oblysynyń Abaı qalasynda órt sóndirý bólimin basqarǵan. Bıylǵy 20 mamyrda jumystan bosatý týraly raport bergen.
