Elordada «Orbulaq shaıqasy» telehıkaıasynyń tanystyrylymy ótti
Joba Táýelsizdik merekesine oraı Qazaqstan telearnasynyń efırinde kórsetiledi.
«Mınıstrlik qurylǵaly beri 2016 jyldan bastap «sheteldik fılmder qaptap ketti degen» máseleni aldymen qolǵa aldyq. Osy jumys aıasynda jyldan jylǵa otandyq telehıkaıalar sanyn kóbeıtip jatyrmyz. Bul álemge eldigimizdi, dástúrimizdi tanytatyn nysandardyń bir bóligi dep esepteımiz. Kelesi jyly mereıli jyldardyń bastamasy bolady: Abaıdyń, Ál-Farabıdiń mereıtoıy kele jatyr, osyndaı jaqsy jobalardy jalǵastyramyz. Kópshilik nazarana usynylǵan bul keremet joba - bastamanyń biri ǵana dep qabyl alyńyzdar», - deıdi mańyzdy jobanyń júzege asýyna qoldaý bildirgen QR Aqparat jáne qoǵamdyq damý mınıstri Dáýren Abaev.
«Orbulaq shaıqasy» 1643 jyly Orbulaq mańynda 50 myń qolǵa tótep bergen 600 qazaq sarbazy týraly túsirilgen alǵashqy telehıkaıa.
«Bul serıal - tarıhty túgendeýge qosqan úlesimiz. Telehıkaıa túsirilimderi Almaty, Jambyl, Túrkistan oblystarynda jáne Orbulaq ózeninde júrgizildi. Kelesi jyly Abaı men Ál-Farabı telehıkaıasy túsiriledi», - deıdi «Qazaqstan» respýblıkalyq teleradıo-korporatsııasynyń Basqarma tóraıymy Lázzat Tanysbaı.
Telehıkaıanyń prodıýseri buǵan deıin «Keıki mergen», «Tar zaman» tarıhı týyndylaryn túsirgen Murat Bıdosov.
«300 spartalyq» týraly fılmdi bárimiz kórdik, tanyspyz. Alaıda Salqam Jáńgirdiń 600 sarbazy týraly azdap estigenimiz bolmasa, shaıqastyń qalaı bolǵanyn ekiniń biri bile bermeıdi. Sol suraqqa jaýap berýge tyrystyq. Teletýyndyǵa 100-den asa keıipker, 50-den asa kaskader qatysty», - deıdi ol.
8 bólimdi telehıkaıa Qazaqstan ulttyq telearnasynan 16-17 jeltoqsan kúnderi saǵat 14:50-de kórsetiledi.
