Elordada ońtústikqazaqstandyq qolóner jáne qylqalam sheberleriniń kórmesi ótti

«Rýhanı jańǵyrý» baǵdarlamasynyń óńirde júzege asyrylǵan jumystarynyń bir jyldyq qorytyndy kórmesi elordadaǵy «Astana» kontsert zalynyń foıesinde uıymdastyryldy. Mundaǵy kórmege 500-ge jýyq jumystar qoıylyp, Astana jurtshylyǵyna tanystyryldy.

Kórmeni uıymdastyrýdyń basty maqsaty qundy jádigerlerden jasaqtalǵan kórme arqyly ońtústiktiń tarıhı shejiresi men qolónershiler, fotosýretshiler, músinshiler, sýretshilerdiń qylqalamynan týyndaǵan óner shyǵarmalary, ádebı shyǵarmalardy nasıhattaý.
 

Keshendi kórmede kelýshiler nazaryna Ońtústik Qazaqstan oblysynyń qasıetti, kıeli jerler tizimine engen tarıhı-mádenı oryndary, mádenı is-sharalarda túsirilgen kórkem, anımatsııalyq, derekti fılmder týraly vıdeo jáne sýretter, belgili qylqalam sheberleriniń shyǵarmalary, qolóner sheberleriniń jasaǵan buıymdary, oblystyń kórkem jerleri beınelengen fotosýretter, sondaı-aq, aqyn-jazýshylardyń kitaptary men ulttyq kıimder, Astananyń kórikti oryndary beınelengen kilemder, «Qazaqstandaǵy 100 jańa esim» jobasyna engen azamattar týraly málimetter ornalastyrylǵan.
 

Astanaǵa tartý retinde jasalǵan kórmeniń ereksheligi, kórme -11 ekspozıtsııalyq bólikten quralǵan. Atap aıtqanda «Ulttyq kıimder» kórmesi - Beıisbekovter otbasy men Esimbekova Gúlnazııanyń ulttyq sándik kıimderi men oblystyq tarıhı-ólketaný mýzeıiniń qoryndaǵy ulttyq kıimderi. «Ońtústik ǵajaıyptary» - óńirdiń ásem tabıǵat kórinisteri men turmys-tirshiligin, kórikti jerlerin sýretteıtin, sondaı-aq, TURKSOY-ǵa múshe fotosýretshiler men oblysymyzǵa belgili fotosýretshilerdiń Qazyǵurt, Túrkistan, Kentaý, Otyrar, Qarataý, Saryaǵash, Jetisaı, Sozaq, Báıdibek, Túlkibas, Tóle bı, Saıram aýdandary men qalalarynda túsirgen fotosýretteri.
 

«Ońtústiktiń kıeli oryndary» - Elbasynyń «Bolashaqqa baǵdar: rýhanı jańǵyrý» baǵdarlamalyq maqalasy aıasynda jasalǵan «Qazaqstannyń kıeli jerleriniń geografııasy» jobasy boıynsha qasıetti, kıeli jerlerdiń tizimine ońtústikten engizilgen tarıhı-mádenı nysandardyń fotosýretteri qoıylady. ıAǵnı, keshendi karta, respýblıkalyq tizimge engizilgen jáne jergilikti tizimge engizilgen qasıetti, kıeli jerler.

Sonymen birge «Sýretshiler, qolóner sheberleriniń týyndylary» - oblystyq Beıneleý óneri mýzeıiniń baǵdarlama aıasynda jınaǵan qundy jádigerlerimen sýretshilerdiń shyǵarmashylyq jumystary, qolónershilerdiń kórkemóner buıymdary jáne «Ońtústiktiń aqyn-jazýshylarynyń kitap kórmesi» - Ońtústikten shyqqan elimizge belgili aqyn-jazýshylardyń «Rýhanı jańǵyrý» baǵdarlamasy aıasynda shyqqan kitaptary men oblystyń tabıǵaty, ólke tarıhyna arnalǵan kitaptary men «Qazaqstandaǵy 100 jańa esim jobasy» - «Qazaqstandaǵy 100 jańa esim» jobasyna Ońtústik Qazaqstan oblysynan engizilgen azamattardyń fotosýretteri men ómirbaıandary bar.
 

Sondaı-aq, «Mádenı is-sharalar kórmesi» - «Rýhanı jańǵyrý» baǵdarlamasy aıasynda oblysta jyl saıyn ótkiziletin OQO ákiminiń 12 is-sharasynyń oryndalǵan 5 is-sharasynan fotosýretter jáne «Ońtústikte túsirilgen fılmderdiń kórmesi» - «Rýhanı jańǵyrý» baǵdarlamasy aıasynda oblysta túsirilgen kórkem, anımatsııalyq, derekti fılmder.

Budan bólek, «Elorda - Astana qalasynyń 20 jyldyǵy» - elordanyń 20 jyldyǵyna arnap toqylǵan, qalanyń kórikti jerleri beınelengen kilemder men «Týǵan jer» baǵdarlamasy - sheńberinde oblysqa kásipkerlik jaǵynan qoldaý kórsetip júrgen azamattarǵa arnalǵan kórme bolsa, sońǵysy «Baǵdarlama aıasynda júzege asyrylatyn jobalardyń kórmesi» - Túrkistan, Otyrar, Ordabasy, Qazyǵurt, Shymkent qalalarynda salynýy josparlanǵan, sáýlet jáne qala qurylysy basqarmasynyń sáýletshileri oryndaǵan jobalar men maketter.