Elordada óńirlik brendter men mádenı bastamalardy nasıhattaıtyn joba bastaldy
ASTANA. KAZINFORM — Astana qalasynda óńirlik kreatıvti ındýstrııalardy damytýǵa baǵyttalǵan Creative Aimaq jobasy bastaý alady. Bul týraly Astana qalasynyń ákimdigi málim etti.
Kreatıvti ındýstrııalardy damytý qory uıymdastyratyn Creative Aimaq jobasy elimizdiń óńirlik shyǵarmashylyq áleýetin, jergilikti brendter men mádenı bastamalardy Astana turǵyndary men qala qonaqtaryna keńinen tanystyrýǵa baǵyttalǵan.
Joba aıasynda elordadaǵy Qazaq Creative Hub alańynda kórmeler, sheberlik saǵattary, mádenı baǵdarlamalar jáne jergilikti óndirýshilerdiń ónimderin tanystyrý is-sharalary ótedi.
Jobanyń alǵashqy aptasy Aqmola oblysyna arnalady. 13-14 maýsym aralyǵynda óńirdiń kreatıvti ındýstrııa ókilderi óz ónimderin, avtorlyq jobalaryn jáne shyǵarmashylyq jetistikterin Astana turǵyndary men qonaqtarynyń nazaryna usynady.
— Búginde Aqmola oblysynda kreatıvti ındýstrııa salasynda 1 myńǵa jýyq kásipkerlik nysan tirkelgen. Óńirdegi neǵurlym damyǵan baǵyttardyń qatarynda baǵdarlamalyq qamtamasyz etýdi ázirleý, kompıýterlik oıyndardy shyǵarý, toqyma jáne tigin óndirisi, ulttyq kıim tigý, sondaı-aq kádesyı daıyndaý bar. Joba aıasynda kelýshiler óńir sheberleri men óndirýshilerdiń biregeı ónimderin satyp ala alady, — delingen elorda ákimdiginiń habarlamasynda.
Aıta keteıik, úzdik áleýmettik jobalar men kásiporyndardy anyqtaıtyn «Paryz-2026» baıqaýy bastaldy.
