Elordada onlaın-kazıno uıymdastyrýshylar 7 jylǵa bas bostandyǵynan aıyryldy
ASTANA. QazAqparat - Sot elordada jasyryn onlaın-kazıno uıymdastyrýshylarǵa jazany qatańdatty. Endi olar aıyppul tólep qutyla almaıdy.
Bul jaıynda QR QM Memlekettik kirister komıtetiniń resmı ókili Murat Jumanbaı málim etti, dep habarlaıdy QazAqparat.
Onyń aıtýynsha, uıymdasqan qylmystyq toptyń basshysy 7 jylǵa bas bostandyǵynan aıyrylsa, qalǵan músheleri túrli merzimge túrmege qamalǵan.
«2017 jyldyń qańtarynda engizilgen narazylyqty qaraý nátıjesinde Astana qalasynyń qylmystyq ister jónindegi sot alqasynyń úkimimen 5 adamnan turatyn qylmystyq toptyń barlyq múshesi aıyptaý baptaryna saı múlikteri tárkilenip, 5-ten 7 jylǵa deıin bas bostandyqtarynan aıyryldy. Uıymdasqan qylmystyq top jetekshisi A.Labýnets 7 jylǵa bas bostandyǵynan aıyryldy. Aıypty tulǵalar sot zalynda tutqyndaldy», - dedi Jumanbaı.
Elorda aýmaǵynda jasyryn oıyn zaldary jelisin qurǵan qylmystyq toptyń áreketine 2015 jyly tosqaýyl qoıylǵan edi. L.Labýnetstiń jetekshiligimen qylmystyq top ınternet qyzmetin usyný jeleýimen onlaın-kazıno uıymdastyryp, zańsyz paıda tapqan.
Astana qalalyq memlekettik kirister departamenti Ekonomıkalyq tergeýler qyzmeti júrgizgen sharalardyń nátıjesinde 10 zańsyz oıyn núktesi joıyldy.
«Oıyn zaldaryn tintý barysynda 148 protsessor men monoblok, sonymen qatar 35 myń AQSh dollary jáne 500 myń teńge kóleminde aqsha tárkilengen edi», - dedi komıtettiń resmı ókili.
Aıta keteıik, 216 jyldyń aqpanynda Saryarqa aýdandyq №2 sot qylmystyq toptyń múshelerine zańsyz jolmen tapqan múlikterin tárkileý arqyly 3 myńnan 5 myńǵa deıingi aılyq eseptik kórsetkish mólsherindegi aıyppul tóleýge úkim shyǵarǵan bolatyn. Biraq, qala prokýratýrasy sottyń mundaı úkimine narazylyq tanytqan edi. Nátıjesinde bıyl sot qylmyskerlerge bas bostandyǵyna aıyrý jazasyn belgiledi.
