Ortalyq Azııada jalǵyz - Elordada onkopatologııany emdeıtin ortalyq ashylmaq
ASTANA. KAZINFORM – Elordada onkopatologııamen aýyratyn patsıentterdi emdeıtin Ortalyq Azııadaǵy jalǵyz ortalyq ashylmaq. Bul týraly Májilis depýtattarynyń saýalyna Premer-mınıstr Oljas Bektenovtiń jaýabynda aıtylǵan.
- Memleket basshysynyń tapsyrmasyna sáıkes, sońǵy jyldary medıtsına salasyn, onyń ishinde medıtsınalyq týrızmdi damytýǵa erekshe kóńil bólinip keledi. Sheteldik patsıentterdi tartý úshin densaýlyq saqtaý uıymdary men servıstik qyzmetterdiń áleýetin arttyrýǵa, sanatorıı-kýrort uıymdarynyń bazasynda sapaly ınnovatsııalyq medıtsınalyq jáne saýyqtyrý qyzmetterin qalyptastyrýǵa nazar aýdarylyp otyr. Osyny iske asyrý maqsatynda Úkimet Qazaqstan Respýblıkasynyń týrıstik ındýstrııasyn damytýdyń 2029 jylǵa deıingi tujyrymdamasyn bekitti, - dedi Oljas Bektenov.
Úkimet basshysynyń dereginshe, Densaýlyq saqtaý mınıstrligi medıtsınalyq týrızmdi damytýǵa baǵyttalǵan jol kartasyn qabyldady. Sanatorıı-kýrort salasyn damytý maqsatynda 2022 jyly Densaýlyq saqtaý mınıstrliginde Kýrortologııa jáne medıtsınalyq reabılıtatsııa ǵylymı-zertteý ınstıtýty quryldy. Elimizdiń 2 sanatorııi («Mankent», «Oqjetpes») halyqaralyq akkredıtatsııadan ótip, Býrabaıda ornalasqan «Oqjetpes» shıpajaıy Ortalyq Azııadaǵy «EuropeSPA» halyqaralyq sertıfıkatyn ıelengen alǵashqy sanatorıı boldy.
- Búginde elimizdiń medıtsınasy Ortalyq Azııada jetekshi bolyp, ozyq emdeý tehnologııalaryn engizýde. «ALEM (ALEM)» ınnovatsııalyq qurylǵysy jasaldy, ol donor organdardyń ómirsheńdigin 24 saǵattan astam saqtaýǵa múmkindik beredi. Sonymen qatar elimizde Ulttyq ǵylymı onkologııalyq ortalyq bazasynda onkopatologııamen aýyratyn patsıentterdi emdeýge baǵyttalǵan protondyq terapııa bólimin ashý josparlanyp otyr. Ol Ortalyq Azııadaǵy jalǵyz beıindi ortalyq retinde belgilengen. Buǵan qosa, medıtsınalyq tehnologııalardy baǵalaý júıesi engizilip, ozyq tıimdi emdeý jáne dıagnostıka ádisterin qoldaný tásilderine basa nazar aýdarylýda, - dedi Premer-mınıstr.
Aıta keteıik, Májilis depýtaty Nurgúl Taý Úkimet basshysyna joldaǵan saýalynda medıtsınalyq týrızm salasynda biryńǵaı operator qurýdy usynǵan edi.