Elordada onkologııalyq qyzmetti jetildirý jónindegi jalǵyz jobanyń birinshi kezeńi aıaqtaldy
ASTANA. QazAqparat - Memleket basshysynyń Qazaqstan Respýblıkasynda aýrý men ólim kórsetkishin tómendetý boıynsha tapsyrmalaryn oryndaý aıasynda Astana qalasynyń onkologııalyq dıspanseri Parıj qalasyndaǵy álemge tanymal Gıýstav Rýssı atyndaǵy onkologııalyq ınstıtýtpen strategııalyq yntymaqtastyq tujyrymdamasyn ázirledi, dep habarlady astana.gov.kz.
Bıyl jeltoqsan aıynda tujyrymdama aıasynda elordalyq onkologııalyq dıspanserde qyzmetti jetildirý boıynsha jobanyń birinshi kezeńi aıaqtaldy. Onkologııalyq aýrýlardy dıagnostıkalaý jáne emdeý hattamalaryn beıimdeý boıynsha jumystar qolǵa alyndy. Nozologııa, asqazan-ishek joldary, ókpe men sút bezderiniń qaterli isigi sııaqty dıagnozdar boıynsha hattamalar ázirlenip, qabyldandy. Astana qalasynyń Densaýlyq saqtaý basqarmasynyń habarlaýynsha, ızolıator ınstalıatsııasy boıynsha jumystar aıaqtaldy, hımııa terapııa boıynsha baǵdarlamalyq ónim engizildi jáne hımııalyq preparattardy ortalyqtan aralastyrý júıesi iske qosyldy, Astana qalasy ákimdiginiń Onkologııalyq dıspanserinde ızolıatordyń resmı ashylýy ótti. Eske salaıyq, joba 3 jylǵa arnalǵan. Bul mańyzdylyǵy jaǵynan Qazaqstandaǵy jalǵyz osyndaı joba. Sondaı-aq, «hımııalyq preparattardy ortalyqtan aralastyrý» ınnovatsııalyq ádisin engizýge, ıaǵnı, emdeý sapasyn arttyrýǵa, hımııa terapııasynyń janama áserin azaıtýǵa, medıtsınalyq qyzmetkerlerdiń densaýlyǵyna keri áserin tómendetýge múmkindik beredi. Hımııaterapııa júrgizý úshin qymbat emdik preparattarǵa bólinetin bıýdjet qarjysyn aıtarlyqtaı únemdeýge yqpal etedi. Aıta keteıik, 2014 jyly onkologııalarmen aýrý kórsetkishi 100 myń adamǵa shaqqanda 163, 6 qurady. Bul ótken jyldyń sáıkes merzimimen salystyrǵanda 4,0% tómen. Sonymen qatar, ótken jylmen salystyrǵanda bıyl onkologııalyq aýrýlardan ólý kórsetkishiniń de tómendegeni baıqalady. 2014 jyly ólim kórsetkishi 100 myń adamǵa shaqqanda 81,38 qurady. Bul ótken jylmen salystyrǵanda 1,5 paıyzǵa az.
