Elordada óńirlerden kelgen ózge ult ókilderi arasynda qazaq tilin bilýden baıqaý ótip jatyr

ASTANA. QazAqparat - Astanada ózge ult ókilderi memlekettik tildi bilý baıqaýynda tartysqa túsip jatyr. Bul týraly búgin Astanada QR Mádenıet jáne sport mınıstrligi Tilderdi damytý jáne qoǵamdyq-saıası jumys komıteti basqarmasynyń basshysy Tolqyn Isakova málim etti.

«Til - tatýlyq tiregi» respýblıkalyq baıqaýy Qazaqstan halqy Assambleıasynyń jyly aıasynda uıymdastyrylyp otyr. Atap aıtqanda, búgin Astanadaǵy aqtyq saıysqa óńirlerde jeńimpaz bolyp tanylǵan 16 adam kelip otyr. Sonymen qatar olarǵa jankúıer retinde óńirlerden 150-ge jýyq arnaıy delegat keldi. Elordadaǵy qorytyndy kezeń eki kúnge jalǵasady, ıaǵnı búgin «Memlekettik tildi bilý - bul...» degen taqyrypta úmitkerler esse jazdy. Al erteń baıqaýdyń ekinshi kezeńi aıasynda barlyq úmitkerler óz óńirlerin tanystyrý men «Oı jarys» saıysy boıynsha suraqtarǵa jaýap beredi»,-dedi ol.

Sondaı-aq erteń qazylar alqasy qatysýshylardyń biliktiligin saraptap, marapattaý sharasy ótetin bolady. Jeńimpazdar men qatysýshylarǵa aqshalaı jáne yntalandyrý syılyqtary tabystalady.

«Bul joly memlekettik tildi jetik meńgergen memlekettik qyzmettegi, bıýdjettik mekemedegi 18-30 jas aralyǵyndaǵy jastardy qamtýǵa tyrystyq. Baıqaýǵa túrli salanyń qyzmetkerleri qatysty»,-dedi T. Isakova.

Aıta keteıik, baıqaýǵa Qazaqstanda turatyn etnos ókilderi qatysty. Sharanyń maqsaty - ózge etnos ókilderiniń arasynda memlekettik tildiń qoldanys aıasyn arttyrý. Baıqaý bıylǵy 12 qańtarda aımaqtarda bastaldy. Osy oraıda úmitkerler óńirlik kezeńde «Til - tatýlyq tiregi» taqyrybynda beınerolık saıysyna qatysqan bolatyn.