Elordada ońaltý jáne ınklıýzııa sharalaryn qarjylandyrý artty – ákim
ASTANA. KAZINFORM – Bul týraly Úkimet otyrysynda ınklıýzıvti saıasatty júzege asyrý sharalaryn talqylaý kezinde elorda ákimi Jeńis Qasymbek málim etti.
- Qala bıýdjeti áleýmettik baǵytyn saqtap otyr, ıaǵnı áleýmettik qorǵaý, bilim berý, densaýlyq saqtaý jáne ózge de qoldaý baǵyttaryna jumsalady. Osy jyly ońaltý jáne ınklıýzııa sharalaryn qarjylandyrý 12%-ǵa ulǵaıtyldy. Medıtsınalyq jáne ońaltý qyzmetteri tolyq kólemde qamtamasyz etiledi. Sonymen qatar jumyspen qamtýǵa járdemdesý sharalary iske asyrylyp keledi, - dedi J.Qasymbek.
Onyń aıtýynsha, ınklıýzıvti bilim berýdi damytýǵa erekshe nazar aýdarylyp keledi. Qalada 24 mamandandyrylǵan uıym jumys isteıdi, sondaı-aq 800 oryndyq jańa arnaıy mekteptiń qurylysy júrip jatyr. Bul balalardy mamandandyrylǵan qoldaýmen 100% qamtýǵa múmkindik beredi.
- Sonymen qatar kedergisiz qalalyq orta júıeli túrde qalyptastyrylyp jatyr. Qoljetimdilik jobalaý kezeńinen bastap eskeriledi. Bul jumys 173 lokatsııany abattandyrý barysynda jalǵasady. Kólik qoljetimdiligin damytý jalǵasyp jatyr: qoǵamdyq kóliktiń 93%-dan astamy beıimdelgen. «Invataksı» qyzmeti keńeıtilip, 2,5 myńnan astam adam qamtylyp keledi. Sonymen qatar Yandex Go servısimen pılottyq joba iske asyrylyp jatyr, - dedi ákim.
Onyń sózine qaraǵanda, tsıfrlyq jáne ınnovatsııalyq sheshimderdi engizý josparlanyp otyr. Olardyń qatarynda qoldy paıdalanbaı qurylǵylardy basqarýǵa arnalǵan joba, Smart Astana júıesinde «InvaTaksı» servısin damytý, sondaı-aq áleýmettik qyzmetterdiń sapasy men qaýipsizdigin arttyrý úshin jasandy ıntellekt tehnologııalaryn qoldaný bar.
Budan buryn habarlanǵandaı, bıyl ınklıýzıvti jumyspen qamtý múmkindigi keńeıtiledi.
