Elordada ombylyq sýretshi Amangeldi Shákenovtyń «Dala áýenderi» atty kórmesi ashyldy
sp; ASTANA. Qarashanyń 10-y. QazAqparat /Marlan Jıembaı/ - Búgin elordadaǵy Prezıdenttik mádenıet ortalyǵynda qylqalam sheberi Amangeldi Shákenovtyń «Dala áýenderi» atty kórmesi ashyldy,
dep habarlaıdy QazAqparat.
Kórmeniń ashylý rásiminde sóz sóılegen Prezıdenttik mádenıet ortalyǵynyń dırektory Myrzataı Joldasbekov, «biz búgin mádenıetimizdegi, Astana óneriniń tarıhyndaǵy eleýli bir sátin basymyzdan keshirip otyrmyz. Ombydan kelgen baýyrymyz Amangeldi Shákenovtiń kórmesi ónerdiń, beıneleý óneriniń jańa bir tarıhyn, jańa betterin ashqandaı áserdemin», dedi.
Jeltoqsannyń 10-na deıin jalǵasatyn kórmege sýretshiniń 78 eńbegi men 40-tan astam etıýdy qoıylǵan. Onyń eńbekteri Omby óńiriniń sulý tabıǵatyn beıneleýmen qatar, qazaqtyń uly tulǵalarynyń portretterin, qazaq aýylynyń tynys-tirshiligin shynaıy kórsetýimen de erekshelenedi.
«Meniń shyǵarmalarym týǵan ólkeme degen yntyzar kóńilimdi,súıispenshiligimdi bildiredi. Búgin ashylǵan kórmeniń ataýymen birneshe márte is-shara ótkizgen bolatynmyn. Sebebi, bul ataý meniń ishki jan-dúnıeme etene jaqyn», deıdi A.Shákenov.
Reseıdiń Omby oblysynda dúnıege kelgen Amangeldi Shákenov QR Kórkemóner akademııasynyń akademıgi, Reseıdiń eńbek sińirgen mádenıet qyzmetkeri, Reseı Sýretshiler odaǵynyń, Qazaqstan Sýretshiler qaýymdastyǵynyń múshesi. Qazir Omby memlekettik pedagogıkalyq ýnıversıtetiniń professory bolyp jumys isteıdi.
