Elordada oqýshylarǵa «Teatr sabaǵy» ótkiziledi
NUR-SULTAN. QazAqparat - Elordalyq mektep oqýshylaryna «Teatr sabaǵy» ótkiziledi, dep habarlaıdy QazAqparat qala ákimdigine silteme jasap.
30 qańtarda Nur-Sultan qalasynyń ákimdigi «Astana Opera» teatrymen birlesip 9 synyp oqýshylaryna arnap «Teatr sabaǵy» atty jańa, qyzyqty shyǵarmashylyq jobany bastaıdy.
«Bul mektepte oqýshylardyń boıyna mádenıetke degen mahabbat pen adamı-rýhanı qundylyqtarǵa baýlyp qana qoımaı, sondaı-aq olardyń shyǵarmashylyq qabileti men darynyn ashýǵa múmkindik beredi», - dedi qala ákimi Altaı Kólginov.
«Astana Opera» teatry belsendi aǵartýshylyq qyzmetin júrgizip kele jatqanyn aıtyp ótken jón, onyń repertýarynda balalar men jasóspirimderge arnalǵan túrli jobalar men kontsertter bar.
«Ókinishke qaraı karantın kezinde balalar túrli gadjetti kóp paıdalanady, teledıdardy kóp kóredi, kompıýter oıyndaryn oınaıdy, sondyqtan opera jáne balet ártisterimiz ben orkestr mýzykanttarymyzdyń sheberligi, sán-saltanaty jarasqan tamasha teatrymyz balany jańa atmosferaǵa bólep, oǵan asqaq óner álemin ashady dep úmittenemiz. Bizdiń mindetimiz – bolashaqtaǵy kórermenderimizdi, opera jáne balet ónerin súıer qaýymdy mektep jasynan bastap qalyptastyrý», - dedi mádenıet qaıratkeri, tanymal mýzykatanýshy Marjan Jákenova.
«Teatr sabaǵyn» tek joǵary synyp oqýshylary, ıaǵnı bozbalalar men boıjetkender úshin ótkizý týraly sheshim qabyldandy.
«Olardyń keıbireýi, árıne, teatrda bolǵan, alaıda óner ordasyna kelýdiń árbir sáti – bul árdaıym meıram emes pe! Teatrda eshqashan bolyp kórmegen, jaı ǵana janynan ótip bara jatyp, bul qoljetimsiz dep oılaǵan balalar da bar. Shyn máninde, teatrdyń esigi balalar úshin de, eresekter úshin de aıqara ashyq», - deıdi Marjan Jákenova.
Balalar úshin alǵashqy teatr qońyraýy 30 qańtarda soǵylady. Jas kórermender nazaryna álemdik horeografııa jaýhary – L.Mınkýstyń «Baıaderka» baleti daıyndaldy. Іs-shara baǵdarlamasyna sáıkes, oqýshylar teatrǵa spektakldiń bastalýyna deıin 2 saǵat buryn keledi. Olardyń nazaryna slaıdtardy qoldaný arqyly tartymdy túrde 15 mınýttyq dáris ázirlendi, tájirıbeli mýzykatanýshylar balettiń mazmuny, kompozıtory, horeografy, qoıylym týraly, sondaı-aq balalardyń bul kúni sahnadan kóretin solıster týraly qyzyqty aqparatty áńgimelep beredi.
Teatr sabaǵyna 30 oqýshy keledi. Olar on adamnan úsh topqa bólinedi. Teatr boıynsha balalardy sahna syrty álemine saıahat jasatý úshin úsh ekskýrsııa jetekshisi alyp júretin úsh baǵdar ázirlendi.
«Balalar qoıylymdy jasaýdyń artynda qanshama adamnyń turǵanyn kóredi. Biz grım bólmesine bas suǵamyz, olar ártisterge qalaı grım jasaıtynyn, qandaı jasandy shashtardyń bolatynyn kóredi. Sodan kostıýmerlik tsehqa kiremiz, onda balalar balet pachkasyn ustap kórip, onyń qanshalyqty jeńil ekenine kóz jetkize alady. Jeńil balet kostıýmderi men mysal retinde XVIII ǵasyrdyń aıbyndy opera kıimderi arasyndaǵy aıyrmashylyqty kóredi. Aıaq kıim tsehynda balalar naǵyz balet pýantalaryn qolmen ustap kóre alady. Sózsiz, olarǵa býtafor jáne rekvızıt tsehtarynda qyzyqty bolar, bul jerde olar býtaforııanyń ne ekendigin jáne dekoratsııalardyń qalaı jasalatynyn biletin bolady. Ekskýrsııa kezinde barlyq qaýipsizdik sharalary saqtalady – balalar bastaryna kaska kıedi. Sondaı-aq olardyń baǵdaryna mýzykalyq kitaphana, daıyndyq zaldary men taǵy basqalar kiredi», - dedi Marjan Jákenova.
Eske salsaq, Memleket basshysy Qasym-Jomart Toqaev halyqqa Joldaýynda: «Balalar úshin qaterli búgingideı aýmaly-tókpeli zamanda olardyń kúsh-jigeri men qyzyǵýshylyǵyn durys arnaǵa baǵyttaý asa mańyzdy. Balalar memleketimizdiń bolashaǵy emes pe?!» dep málim etken edi.
