Elordada oqýshylarǵa arnalǵan Jańa jyldyq sharalar onlaın ótedi
NUR-SULTAN. QazAqparat – Elordada jańa jyldyq is-sharalar barlyq bilim berý uıymdarynda bekitilgen josparǵa sáıkes onlaın formatta ótedi. Bul týraly Nur-Sultan qalalyq bilim basqarmasynyń basshysy Sholpan Qadyrova aıtyp berdi, dep habarlaıdy QazAqparat tilshisi.
«Qazirgi tańda ata-analardy bilim berý uıymdarynda jańa jylǵa arnalǵan merekelik sharalardyń qalaı ótetitini týraly suraq mazalaıtynyn bilemin. Jańa jyl – bul jaı ǵana mereke emes, ár bala úshin ǵajaıyptyń belgisi ispettes. Jańa jyl qarsańynda bilim berý uıymdarynda buryn shyrshalar bezendirilip, ádemi kıimdersiz jáne tátti syılyqtarsyz ótkizilmeıtin. Alaıda karantındik shekteý sharalaryna baılanysty bilim berý uıymdarynda joǵaryda atalǵan is-sharalardy ótkizýge jol berilmeıdi», - dedi Sholpan Qadyrova elorda ákimdiginde ótken baspasóz máslıhatynda.
Onyń aıtýynsha búgingi kúni mektepke deıingi uıymdarda árbir topta barlyq sanıtarlyq talapty saqtaı otyryp, ata-analardyń qatysýynsyz «Qosh keldiń, Jańa jyl» taqyrybynda merekelik sabaqtar ótkizilýde. Jańa jyldyq sabaqtardy ótkizý úshin toptar taqyrypqa sáıkes bezendirilgen. Ár topqa shyrsha ornatylǵan. Sabaq stsenarııine sáıkes ár bala merekelik kıimmen qatysady. Sonymen qatar, Qazaqstan Respýblıkasy Prezıdentiniń jáne Nur-Sultan qalasy ákiminiń atynan mektep oqýshylaryna jańa jyldyq syılyqtardy tabystaý boıynsha jumystar uıymdastyrylýda.
«QR Prezıdentiniń atynan jańa jyldyq syılyq jıyntyǵy ata-anasynyń qamqorlyǵynsyz qalǵan jetim balalar men erekshe bilim berý qajettilikteri bar 200 balaǵa beriledi. Keshe, ıaǵnı 24 jeltoqsanda balalarǵa jańa jyldyq syılyqtar, ıaǵnı - Prezıdenttiń quttyqtaý haty, kitap jáne «Orchestra» dúkenderinen kıim satyp alýǵa 100 myń teńgege sertıfıkat, táttiler men ústel oıyny tabystaldy. Al 25 jeltoqsan kúni Nur-Sultan qalasy ákiminiń atynan jańa jyldyq syılyq jıyntyqtary az qamtylǵan, kóp balaly jáne tolyq emes otbasylardan shyqqan balalarǵa, jáne ár túrli jetistikterge jetken daryndy 450 balaǵa tabystalady. Balalarǵa jańa jyldyq syılyqtardy Aıaz Ata men Aqshaqar sanıtarlyq normalardy saqtaı otyryp, balanyń úıine baryp saltanatty túrde tabystaıdy. Jańa jyldyq is-sharalar barlyq bilim berý uıymdarynda bekitilgen josparǵa sáıkes onlaın formatta ótedi», - dedi ol.
