Elordada oqýshylardyń jolaqy jeńildigi taǵy 15 kúnge uzartyldy
ASTANA. QazAqparat - Elordada mektep oqýshylaryna qoǵamdyq kóliktiń jol aqysyna arnalǵan jeńildik 1 qazanǵa deıin uzartyldy, dep habarlaıdy QazAqparat tilshisi.
«Qurmetti ata-analar! Qala basshylyǵy balalar úshin 40 teńge kóleminde bekitilgen jol júrý aqysynyń merzimin 2018 jyldyń 1 qazanyna deıin uzartty. Balalar úshin kartamen de, qolma qol tólemmen de jol júrý quny 2018 jyldyń 1 qazanyna deıin 40 teńge bolyp saqtalady», - delingen «Astana LRT» kompanııasynyń feısbýktegi habarlamasynda.
Kompanııa balalardyń mektep kartasyn jasatýǵa ótinish bermegen ata-analarǵa bul isti keıinge qaldyrmaýdy suraıdy.
«Balalardyń kóliktik kartasyn jasatýdyń eki joly bar. Birinshiden, «Astana LRT» JShS ortalyq kassasyna kelip ótinish toltyryp, odan ári daıyn kartany oqyp jatqan mektepten alýǵa bolady. Ekinshiden, transcard.kz saıtyna onlaın-ótinim jiberip, odan ári, daıyn kartany ortalyq kassaǵa kelip alýǵa múmkindik bar. Birinshi márte kartany alý - tegin. Karta joǵalǵan jaǵdaıda qaıta qalpyna keltirý 400 tenge», - delingen habarlamada.
«1 qazannan bastap karta arqyly jol aqysyn tólegen oqýshylar úshin jol aqysy 40 teńge, al qolma-qol tólegen oqýshylar úshin 90 teńge bolady», - dedi QazAqparat tilshisine «Astana LRT» kompanııasynyń baspasóz hatshysy Naýat Azanbaeva.
Eske sala ketsek, buǵan deıin de elordada oqýshylarǵa qoǵamdyq kólikterde júrý aqysyn qolma-qol 40 teńgeden tóleý 15 qyrkúıekke deıin uzartylǵan bolatyn.
