Elordada oqýshylar qoqysty bólek jınaýdy úırendi
ASTANA. QazAqparat - Astanada turmystyq qaldyqty bólek jınaýǵa qatysty jobanyń ekinshi kezeńi bastaldy, dep habarlaıdy QazAqparat ákimdiktiń saıtyna silteme jasap.
27 qazannan bastap qaldyqtardy ekinshi ret jınaqtaý úshin qalanyń barlyq mektepterine sary konteınerler ornatyla bastady.
Qalanyń 30 mektebinde «Vpererabotký» aktsııasy boıynsha oqytý bastaldy. № 14 mektep-gımnazııada oqýshylar men ata-analar úshin qaldyqty bólek jınaýǵa arnalǵan taqyryptyq sabaq ótti.
«Bul shara balalardy úlgili bolýǵa, qoqysty bólek jınaýdyń mádenıeti men qorshaǵan ortany syılaýdy úıretedi. Bul aýlamyzdyń, qalamyzdyń qala berdi álemniń tazalyǵyn saqtaý úshin mańyzdy», - dedi Qoǵamdyq bastamalardy damytý qory tóraǵasynyń orynbasary Ásel Muqanova. Qorshaǵan ortany qorǵaý jáne tabıǵat paıdalaný basqarmasynyń bas mamany Aınur Soltanǵulova balalarǵa jobanyń mánin túsindirdi.
«Shıkizatty qaıtadan óńdeýge bolady, ıaǵnı metall, shyny, qaǵazdan jańa ónim daıyndalady. Mysaly 7 plastık bótelkeden bir fýtbol formasyn jasaýǵa bolady, Nike kompanııasy osyndaı aktsııa uıymdastyrdy. Mundaı bastama álemde kóp, sizder jastar qorshaǵan ortany jaqsartýǵa úles qosyńyzdar», - dedi ol.
Qaldyqty bólek jınaý boıynsha konkýrsta jeńimpazǵa bir sebet alma berildi.
№ 14 mektep-gımnazııanyń dırektory Oleg Nadeın qoqystyń «ekinshi shıkizat» ekenin, onyń qaıta óńdeýge bolatynyn aıtty.
«Biz buryn tastaı salatyn qoqystardan ózge materıal óndirýge bolady. Búginde bizdiń aldymyzda qoqysty tastaı salmaı suryptap, óńdeý mindeti tur. Oqýshylar qaldyqty bólek jınaýǵa ádettense qoǵamda bul keńirek taraıdy. Sharanyń arqasynda aýdanymyz tazara tústi», - dedi ol.
