Elordada oqýshylar arasyndaǵy ǵylymı jobalar baıqaýynyń jeńimpazdary marapattaldy
ASTANA. QazAqparat - QR Tuńǵysh Prezıdenti mýzeıinde oqýshylar arasyndaǵy «Álemdi ózgertetin ıdeıalar» baıqaýynyń jeńimpazdaryn marapattaý saltanaty ótti, dep habarlady qalalyq ákimdiktiń baspasóz qyzmetinen.
Baıqaýda «Kún sáýlesi arqyly jaryqtandyrý qurylǵysy» jáne «El ekonomıkasynyń balamaly túrge - «Jasyl ekonomıka» formatyna aýqymdy betburysy» taqyrybyndaǵy jobalarmen Ashat Ábýbákirov pen Ásel Orynbekova kósh bastady.
Elimizdiń Táýelsizdiginiń 25 jyldyǵyna oraılastyrylǵan shara «100 naqty qadam» Ult jospary sheńberinde qoǵamdaǵy ózekti máselelerdi tanyp-bilýge jáne júzege asyrýǵa baǵyttalǵan oqýshylardyń ǵylymı-zertteýshilik jáne oqý-tanymdyq qyzyǵýshylyǵyn yntalandyrady.
Bıyl baıqaý ekinshi ret ótkizildi, oǵan 36 jobamen 46 bala qatysyp, ózderiniń ǵylymı jobalaryn qorǵady. Baıqaý úsh kezeńmen ótkizildi. Birinshi týr qalalyq mektepterde uıymdastyryldy, sodan keıin jobalar saraptamadan ótkizildi, al úshinshi kezeńde mektepter ózara jarysty.
Qazylar alqasynyń sheshimimen baıqaý jeńimpazdary men júldegerleri polıtehnıkalyq jáne gýmanıtarlyq baǵyttar boıynsha anyqtaldy. Ǵylymı jobalardyń basym bóligi qazaqstandyqtardyń ómir súrý sapasyn jaqsartýǵa baǵyttalǵan joǵary tehnologııalarǵa arnalǵan.
