Astanada oqýshylarǵa arnalǵan halyqaralyq ǵylymı forým ótti
ASTANA. KAZINFORM — Qazaqstan Prezıdenti Іs basqarmasynyń Prezıdenttik ortalyǵynda elimizdegi Ǵylym qyzmetkerleri kúni men akademık Qanysh Sátbaevtyń 125 jyldyǵyna oraı oqýshylarǵa arnalǵan «Ǵylymı bilim, ınnovatsııa jáne jastar – turaqty damý negizderi» atty halyqaralyq ǵylymı forým ótti.
Іs-sharany balalardyń ǵylymı shyǵarmashylyǵyn kótermeleý jáne qazaqstandyq oqýshylardy halyqaralyq ǵylymı qoǵamdastyqqa keńinen tartý maqsatynda uıymdastyrdy. Forým jumysyna Qytaı, Pákistan, Týnıs, Indonezııadan kelgen ǵylymdy dáripteýshiler, sondaı-aq Qyrǵyzstan, Ózbekstan jáne elimizdegi oqýshylar men muǵalimder qatysty.
«Ǵylym men bilim bizdiń qoǵamnyń damýynda sheshýshi ról atqarady. Sizdiń osy forýmǵa qatysýyńyz – álemdi bilim men ınnovatsııa qalyptastyratyn bolashaqty qurýdaǵy qadam. Osynda otyrǵan oqýshylar elimizdiń bolashaǵy jáne sizdiń problemalardy sheshýge degen qyzyǵýshylyǵyńyz, ynta-jigerińiz jáne shyǵarmashylyǵyńyz ǵylym men bilim berýde jańa bıikterge jetý úshin qajet negizgi qasıetter sanalady», - atap ótti QR Ǵylym jáne joǵary bilim mınıstri Saıasat Nurbek.
BRISEC Prezıdenti, Qytaı Ǵylym akademııasynyń akademıgi, professor Hıang Pıng Vý halyqaralyq yntymaqtastyq ǵylymı áleýetti damytý úshin negiz sanalatynyn, sondaı-aq ǵylymı bilim kedergilerdi buzatyn jáne jahandyq qaýymdastyqty aǵartatyn álem qurý qajet ekenin atap ótti.
«Ǵylymı forým – óskeleń urpaqtyń zııatkerlik áleýetin shoǵyrlandyratyn jáne olardyń ǵylymǵa degen adaldyǵyn kótermeleıtin kommýnıkatıvtik alań. Mektep oqýshylaryna arnalǵan ǵylymı forýmnyń maqsaty – ǵylym, ınnovatsııa jáne ónertabystyń túrli salalaryndaǵy máselelerdi sheshýge baǵyttalǵan jasóspirimderdiń ǵylymı jobalaryn kórsetý. Іs-sharaǵa Qazaqstannyń barlyq óńirinen alǵash ret 700-den astam oqýshy, sondaı-aq Qyrǵyzstan, AQSh, Indonezııa, Ózbekstannan kelgen oqýshylar qatysady. Bul tek Qazaqstanda ǵana emes, odan tys jerlerde de osy forýmnyń ósip kele jatqan tanymaldylyǵyn aıǵaqtaıdy», - dedi ICSC Prezıdenti Lázzat Qusaıynova.
Bul sharanyń ereksheligi – forým spıkerleri shetelde halyqaralyq ǵylymı konkýrstardyń jeńimpazdary atanǵan balalardyń ózderi, sondaı-aq ǵylymı ázirlemeleri patentteý nemese avtorlyq quqyqty tirkeý satysynda turǵan jasóspirimder boldy.
Іs-shara sońynda Prezıdenttik ortalyqtyń mýzeıi boıynsha ekskýrsııa uıymdastyryldy. Onda forýmǵa qatysýshylar prezıdenttik ınstıtýtty damytý prızmasy arqyly Qazaqstannyń memlekettiliginiń qalyptasý tarıhymen egjeı-tegjeıli tanysty.
Atap ótken jón, Prezıdenttik ortalyqtyń jastardyń azamattyq sanasyn qalyptastyrýǵa, sondaı-aq óskeleń urpaqtyń jasampaz qundylyqtaryn nyǵaıtýǵa baǵyttalǵan mádenı-bilim berý qyzmeti uıym basymdyqtardyń biri sanalady.
Esterińizge sala keteıik, 2024 jyldyń basynan bastap QR PІB Prezıdenttik ortalyǵy Qazaqstannyń orta oqý oryndarynyń 600-den astam oqýshysyn qamtı otyryp, 20-ǵa jýyq túrli mádenı-bilim berý is-sharalaryn ótkizdi.