Elordada oqýshylardyń qaýipsizdigi men tártibi JI kameralary arqyly baqylanady
ASTANA. KAZINFORM – Elordadaǵy №107 mektep – jasandy ıntellekt múmkindikterin qoldanyp jatqan bilim ordalarynyń biri. Munda beınebaqylaý kameralaryna JI júıesi ornatylǵan. Júıe balalardyń qaýipsizdigi men tártibin jiti nazarda ustaıdy, dep habarlady elorda ákimdiginiń resmı saıty.
Astananyń Esil aýdanynda ornalasqan bilim ordasy 2024 jyly ashylǵan. Munda búgingi tańda 847 oqýshyǵa 63 pedagog bilim beredi. Tolyqtaı tsıfrlyq júıege kóshken mektepte beınebaqylaý kameralaryna jasandy ıntellekt júıesi ornatylǵan.
– Qyrkúıek aıynan bastap biz JI negizindegi mektep modelin júzege asyrýdy bastadyq. Joba aıasynda mekteptiń beınekameralaryna JI múmkindikteri engizildi. Ol úshin biz «Protector AI» kompanııasymen kelisimshart jasastyq. Nátıjesinde olar bizge jańa qurylǵylardy eksperıment retinde ornatty, - dedi mektep dırektory Aıgúl Beısenbına.
Onyń aıtýynsha, mektepte balalardyń tártibi men qaýipsizdigin JI júıesi ornatylǵan beınebaqylaý kameralary jiti nazarda ustaıdy.
– Bul mektep qabyrǵasynda oqýshylardyń agressıvti áreketterin birden baıqaıdy. Máselen eger balaǵa ózge qatarlasy kúsh kórsetse, bolmasa ol mektepte ereje buzsa, jasandy ıntellekt kameralary birden jazbany mektep dırektoryna, ıaǵnı maǵan joldaıdy. Keıin biz oqıǵaǵa qatysty balalardyń ata-analaryn mektepke shaqyrtyp, túsindirý júrgizemiz, - dedi basshy.
Sondaı-aq bul kameralar oqýshynyń kóńil-kúıin anyqtap otyrady.
– Eger oqýshy 5 retten artyq ashýly bolyp júrse, onda pedagog qosymsha jumystar júrgizedi. Máselen oqýshyǵa trenıngter ótkizedi. Bul júıe kómekshi qural retinde qyrkúıek aıynda iske qosyldy. Mundaǵy maqsat – kez kelgen oqıǵanyń saldarymen kúresý emes, kerisinshe olardyń aldyn alý. Mektepte jyl saıyn bala sany artyp jatyr. Oqý ordasy ashylǵan ýaqytta 242 oqýshy bolsa, qazir olardyń sany 847-ge jetti. Aldaǵy ýaqytta 1 200-ge deıin artady degen jospar bar. Álbette, mektepte barlyq jerde beınebaqylaý kamerasy ornatylǵan. Alaıda olardyń barlyǵyn qarap otyrý múmkin emes. Al JI negizindegi beınebaqylaý kameralary birden oqıǵa týraly eskertip otyrady, - dedi dırektor.
Mektep dırektorynyń aıtýynsha, jasandy ıntellekt bilim sapasyn arttyrýda da kóp septigin tıgizip otyr.
– Jasandy ıntellekt negizindegi mektep modeliniń maqsaty – oqýshylardyń qaýipsizdigin ǵana qamtamasyz etý ǵana emes, bilim berý sapasyn arttyrý. Sol baǵytta pedagogter byltyr mamyr-qyrkúıek aılarynda JI múmkindikterin meńgerý kýrstarynan ótti. Nátıjesinde muǵalimder sabaqtaryn qyzyqty ári tıimdi, paıdaly ótkizý úshin jasandy ıntellekt múmkindikterin qoldanyp júr. Tipti búgingi tańda ár pedagogtiń jeke jınaqtary bar. Onda pán sabaqtary boıynsha vırtýaldy zerthanalar, tapsyrmalar, testter engizilgen. Sabaq barysynda oqýshy teorııalyq bilimdi praktıkamen ushtastyrady. Jańa taqyryptardy sońynda test tapsyrmalarymen bekitedi. Test tapsyrmalaryn da ustazdar JI arqyly jasaıdy. Keıin ony oqýshylar onlaın oryndaıdy. Osylaısha muǵalim test qurastyrý, ony tekserý boıynsha biraz ýaqytyn únemdeıdi, keıin JI balanyń pán boıynsha bilimin arttyrý jaıly muǵalimge baǵyt-baǵdar beredi. Sondaı-aq ustazdar qaýymy osyndaı túrli konkýrsqa qatysyp, júldeli oryndar ıelenip jatyr. Bastysy olar bul baǵytta zertteýshilik jumystarymen aınalysady, - dep bólisti Aıgúl Bazarbaıqyzy.
Taǵy bir aıta keterligi, mekteptiń birinshi qabatynda kireberisinde úlken LED-ekran ornalasqan. Munda JI-gıdi kelýshilerge bilim ordasy jaıly barlyq aqparatty aıtyp beredi.
Buǵan deıin jasandy ıntellekt týraly zań kúshine engenin jazǵanbyz.