Elordada oqýshylardy tamaqtandyrýǵa bólinetin soma artady

Búgin Astanada qalalyq kásipkerler palatasy alańynda mektep oqýshylaryn sapaly tamaqtandyrý máselesi talqylandy, dep habarlaıdy Kazinform.

"Mekteptegi tamaqtaný boıynsha másele bıýdjettiń tapshylyǵymen baılanysty. Búginde jańa as máziri daıyn: Biraq jańa mázirdi qalalyq Bilim basqarmasy da, bıznes ókilderi qabyldamaı otyr. Óıtkeni, olar baǵany 600 teńgege deıin ósirý týraly sheshim qabyldamaqshy. Jeke menshik mektepterdiń alatyn somasy memlekettikten eki ese artyq. Olarda birneshe ret tamaqtandyrý múmkindigi bar. Keıbir kásipkerlerdiń qural-jabdyǵy tozǵan, olar nesıe alý kerek. Bul qosymsha shyǵyn. Sosyn jumysshylardyń jalaqysy bar, ony da kóterý kerek», - dedi Astana qalasy kásipkerler palatasynyń dırektory Beısen Jolboldıev jıyn barysynda.

Onyń aıtýynsha, kásipkerler mekteptegi tamaqtandyrý boıynsha óz mindetin oryndaýǵa daıyn. Degenmen olarda tabys kórý kerek.

«Tamaqtandyrý boıynsha 3 usynys bar, eger qalalyq máslıhat qoldasa ortasha eseppen nemese joǵaryraq eseppen qaralady. Kásipkerler tamaq baǵasyn 800 teńgege deıin kóterýdi surap otyr. Qazir mekteptegi tamaqtyń baǵasy 584 teńge. Odan bólek, búgingi otyrysta mekteptegi býfet baǵasy da baqylaýǵa alynady. Balalar baǵaǵa qaramaıdy, ala beredi, al baǵa shamadan tys bolmaýy kerek», - deıdi ol.

Sondaı-aq, qalalyq kásipkerler palatasynyń basshysy, mekteptegi tamaqtandyrý boıynsha qarashada máslıhatqa usynys beriletinin aıtty. Eger máslıhat bekitse, kelesi jyldan bastap baǵa ósedi.