Elordada oqý oryndarynyń birinde sheteldikterdi zańsyz tirkeýmen aınalysqandar ustaldy

ASTANA. KAZINFORM – Іshki ister mınıstrligi zańsyz kóshi-qon arnalarynyń jolyn kesý boıynsha júıeli jumys júrgizip jatyr.  

Mınıstrliktiń qyzmetkerleri Astanada sheteldikterdi zańsyz tirkeýmen aınalysqan kúdiktini ustady.

— Ol arnaıy halyqqa qyzmet kórsetý ortalyǵy arqyly jalǵan qujattardy paıdalanyp, jaqyn shet elderden kelgen ondaǵan azamatqa Qazaqstanda ýaqytsha turýǵa ruqsatty zańsyz rásimdegen. Tintý barysynda daıyn medıtsınalyq blankter, mórler, elektrondyq tasymaldaǵyshtar jáne qyzmetke qatysty basqa da qujattar tárkilendi, — dedi ІІM krımınaldyq polıtsııa departamentiniń bastyǵy Qanat Nurmaǵambetov.

Odan bólek elordadaǵy oqý oryndarynyń birinde sheteldikterdi zańdastyrý boıynsha uqsas qylmystyq shema anyqtaldy.

Oqý ornynyń eki qyzmetkeri alys sheteldiń 68-den astam azamatyna jalǵan oqý shaqyrýlaryn rásimdegen. Kásipkermen sheteldik stýdentterdi tartý týraly jalǵan kelisim jasap, oqý protsesin «qoldan» uıymdastyrǵan. Osy qujattar negizinde shetel azamattary Qazaqstanǵa kirip, zańsyz jumys istegen.

— Atalǵan faktiler boıynsha «zańsyz kóshi-qondy uıymdastyrý» babymen sotqa deıingi tergeý amaldary júrgizilýde. Bıyl osyndaı segiz zańsyz arna anyqtalyp, joıyldy. Zańsyz kóshi-qonmen kúres — Іshki ister mınıstrliginiń basym baǵyttardyń biri, — dedi Qanat Nurmaǵambetov.

Aıta ketelik elde bıyl izdeýde júrgen 700-den astam qylmysker ustalǵan edi.