Elordada «Oblystyq, Astana, Almaty qalalyq til úıretý ortalyqtary qyzmetkerleriniń biliktiligin jetildirý» semınary ótýde
ASTANA. Qazannyń 29-y. QazAqparat /Quralaı Orynbekqyzy/ - Búgin elordanyń «Esil» qonaqúıinde QR Mádenıet jáne aqparat mınıstrligi Til komıtetiniń uıymdastyrýymen «Oblystyq, Astana, Almaty qalalyq til úıretý ortalyqtary qyzmetkerleriniń biliktiligin jetildirý» atty ǵylymı-tájirıbelik semınar ótýde,
dep habarlaıdy QazAqparat tilshisi.
Semınarǵa 50-den astam adam qatysýda. «Keshe ǵana Qazaqstan halqy Assambleıasynyń sessııasynda Elbasy, «memlekettik tildi úıretý ortalyqtarynyń jelilerin keńeıtip, olardy árbir qalada jáne aýdan ortalyǵynda, joǵary oqý oryndary men ózge de mekemelerde qurý kerek. Oqytýdyń ınnovatsııalyq formalaryn batyl jáne keńirek engizý qajet», dep atap ótti. Sondyqtan oqytýshynyń bilimdi bolýy basa nazar aýdarýdy qajet etedi», dedi semınardyń ashylýynda Til komıtetiniń tóraǵasy Erbol Shaımerdenuly.
Respýblıka boıynsha osyndaı 94 ortalyq bar. Olardyń 64-i memlekettik bolyp tabylady. «Bizdiń mindetimiz osyndaı ortalyqtardyń sanyn kóbeıtip, olardy qajetti oqý-ádistemelik quraldarymen qamtamasyz etý. Qazaq tilin úıretetin ortalyqtardy odan ári damytý kerek», dep atap ótti Til komıtetiniń basshysy.
E.Shaımerdenulynyń aıtýynsha, osyǵan oraı uıymdastyrylyp otyrǵan búgingi sharanyń maqsattarynyń biri memlekettik qyzmetkerlerge qazaq tilin oqytýdyń tıimdi ádistemelik júıelerin taldap, qazaq tili mamandarynyń bir-birimen tájirıbe almasýlaryna jaǵdaı jasaý bolyp tabylady.
