Elordada «Nurly jer» aıasyndaǵy alǵashqy baspana jyl sońynda tapsyrylady

ASTANA. QazAqparat - «Turǵyn úı qurylys jınaq banki» AQ basqarma tóraıymy Lázzat Ibragımova «Nurly jer» memlekettik baǵdarlamasy aıasyndaǵy birinshi nysan qashan paıdalanýǵa beriletindigin málim etti, dep habarlaıdy QazAqparat.

«Nurly jer» baǵdarlamasy boıynsha biz óńirlerde ıpotekalyq nesıe beremiz. Astanada áli de nysandar joq, al barsha respýblıka boıynsha bar. Atap aıtqanda, Astanadaǵy nysan qyrkúıektiń basynda paıdalanýǵa berilýi tıis edi, qazirgi kezde ol jerge ınfraqurylym tartylyp jatyr jáne jyldyń sońyna deıin bul jumystar támamdalady. Taǵy bir eskerer jaıt, elordada óte úlken konkýrs bolady»,- dedi Ibragımova «Nurly jer» baǵdarlamasyn júzege asyrý barysyna arnalǵan Úkimettegi baspasóz máslıhatynda .

Onyń sózine qaraǵanda, «Nurly jer» memlekettik baǵdarlamasy boıynsha ıpotekalyq nesıeler bes paıyzdyq mólsherlemede beriledi. Sonymen qatar baǵdarlama aıasynda baspananyń sharshy metri 180 myń teńgege baǵalanyp otyr.