Elordada Nurǵısa Tilendıevtiń shyǵarmashylyǵyna arnalǵan kontsert ótedi

Mádenı sharaǵa Astana qalalyq memlekettik fılarmonııasynyń qazaq halyq aspaptar orkestri, kameralyq hory,  KSRO Halyq ártisi, Memlekettik syılyqtyń ıegeri Bıbigúl Tólegenova, QR Halyq ártisteri, Memlekettik syılyqtyń ıegerleri Nurǵalı Núsipjanov, Altynbek Qorazbaev, Nurjamal Úsenbaeva jáne basqa da tanymal oryndaýshylar  qatysady.

Qazaq halyq aspaptar orkestriniń kórkemdik jetekshisi jáne bas dırıjeri QR Eńbek sińirgen qaıratkeri - Aıtqalı Jaıymov.  Kameralyq hordyń kórkemdik jetekshisi jáne dırıjeri QR Eńbek sińirgen qaıratkeri - Erjan Daýtov.

Nurǵısa Atabaıuly Tilendıev (1925-1998 jj.) - qazaqtyń kúıshi-sazgeri, dırıjer, dáýlesker dombyrashy. QR Halyq ártisi, Qazaqstan Respýblıkasy Memlekettik syılyǵynyń ıegeri, KSRO halyq ártisi. N.Tilendıevke 1998 jyly Qazaqstan Respýblıkasy Prezıdentiniń jarlyǵymen «Halyq Qaharmany» ataǵy berildi.

N.Tilendıev - qazaq mýzykalyq mádenıetine sazger, dırıjer, oryndaýshy retinde óshpes iz qaldyrǵan sýretker. Ol - 500-den astam mýzykalyq tól týyndylardyń avtory. Osynaý mol muranyń janrlyq aıasy da qaıran qaldyrady.

Tańdaýly shyǵarmalarynan «Dostyq jolymen», «Meniń Qazaqstanym» kantatasyn, Q.Qojamıarovpen birlesip jazǵan «Altyn taýlar» operasyn, «Ata tolǵaýy» kúıin jáne orkestr úshin jazylǵan shyǵarmalaryn, «Halyq qýanyshy», «Qaırat», «Jeńis soldaty» sııaqty ývertıýralaryn ataýǵa bolady. Onyń «Aqqý», «Ańsaý», «Arman», «Ata tolǵaýy», «Álqıssa», «Qorqyt týraly ańyz», «Kósh kerýeni», «Mahambet», «Farabı sazy» sııaqty kúıleri men «Sarjaılaý», «Alataý», «Aqjaıyq», «Aq qusym», «Óz elim» sııaqty ondaǵan ánderi halyqtyq boıaý-naqyshynyń qanyqtyǵymen, ózindik qoltańbasynyń aıqyndyǵymen jurtshylyqtyń súıip tyńdaıtyn rýhanı qazynasyna aınalǵan. Munyń syrtynda qyryqtan astam pesaǵa jáne jıyrmadan astam fılmge mýzyka jazǵan.

Nurǵısa Tilendıev mýzykasyn jazǵan M. Áýezovtyń, Sh. Aımanovtyń, Á. Tájibaevtyń pesalary, sondaı-aq «Qyz Jibek», «Qıly kezeń», «Meniń atym Qoja», «Qarlyǵashtyń quıryǵy nege aıyr?», «Aqsaq qulan» fılmderi qazaq sahnasy men ekran óneriniń klassıkasyna aınalǵan.