Elordada neke qıǵandar sany úsh ese artty
Nur-Sultan qalasy Esil aýdanynyń azamattyq hal aktilerin tirkeý bóliminiń basshysy Raýshan Zarırovanyń aıtýynsha, qazir turǵyndar nekege jaýapkershilikpen jáne sanaly túrde qaraıdy.
Elordadaǵy jas jubaılardyń ortasha jasy 4-5 jyl buryn 22-23 bolsa, qazir – 25-28 jas.
«Pandemııa jastarymyzǵa oń áser etti deýge bolady. Olar nekege sanaly túrde qaraı bastady. Qazirgi ýaqytta elordada 8 myńnan astam neke qıyldy. Olardyń jasy shamamen 25-28 jas, bul jasta adam bilim alyp, jumys istep, belgili bir mártebege ıe bolady», - dedi Raýshan Zarırova Nur-Sultanda ótken neke kýáligin saltanatty tabystaý aıasynda.
Onyń aıtýynsha, bıyl Nur-Sultan qalasynyń Esil aýdanynda 2,5 myńnan astam neke qıylǵan.
«Nur-Sultanda kúnine orta eseppen 20-25 jup tirkeýge turady. Mysaly, dúısenbide biz 50 jupty tirkedik. Ásirese jastardyń nekelesýi artyp keledi. Tıisinshe, balalar da kóptep týýda. Bul bizdi qatty qýantady. Ótken jylmen jáne 2019 jylmen salystyrǵanda úsh esege jýyq ósim bar», - deıdi R. Zarırova.
2021 jylǵy 1 qańtardan 6 qyrkúıekke deıin Nur-Sultanda 8 197 neke tirkelgen jáne 23 306 týý týraly kýálik berilgen.
Al 2020 jyldyń uqsas kezeńinde Nur-Sultanda 5 956 otbasy qurylyp, 21 572 bala dúnıege kelgen edi.
