Elordada Naýryz meıramy qurmetine merekelik sharalar bastaldy

Qazaqstan táýelsizdiginiń 20 jyldyǵyna oraı uıymdastyrýshylar bıyl kóktemgi ulttyq merekeni keń aýqymda ótkizbek.

Búgin tańerteń Promyshlennyı jáne Jeleznodorojnyı kentterinde halyq serýeni jáne merekelik kontsertter bastaldy. Al keshke elorda turǵyndary men qonaqtary «Naz» memlekettik bı teatrynyń «Ázil álemi» merekelik kontsertin tamashalaıdy.

Negizgi merekelik sharalar erteń ótedi. Tańerteńgi saǵat 10-nan bastap «Qazaq eli» alańynda jáne «Jastar» saraıynyń aldynda halyq serýeni, teatrlandyrylǵan qoıylymdar jáne merekelik kontsert bastalady. Al «Qazaq eli» alańynda naǵyz etnoaýyl boı kóteredi. Munda tigilgen kıiz úılerde toıshy qaýym baýyrsaq pen naýryz-kójeden dám tatady. Bul kúni alańda 20 myńǵa denıin halyq jınalady.

Jurtshylyqtyń alańǵa kelýine yńǵaıly bolýy úshin qoǵamdyq kólik baǵdarlarymen qatar qosymsha ekspress-baǵyttar uıymdastyrdy. Jolaýshylar qosymsha avtobýstarǵa Kongress-holldan, aımaqaralyq aýrýhana aldynan jáne «Qazaqstan» saýda úıiniń qasynan otyrǵyzylady jáne saǵat 11-den 23-30-ǵa deıin ár 10 mınýt saıyn júrip turady. Avtobýstarǵa arnaıy belgiler jazylǵan.

«Jastar» saraıynyń aldynda astanalyqtarǵa teatrlandyrylǵan qoıylym usynylady, halyq serýeni uıymdastyrylady jáne qazaqstandyq estrada juldyzdarynyń kontserti bolady.

Tańerteń, saǵat 11-de «Báıterek» monýmenti alańynda, Aqbýra, Qozykósh aýyldarynda, saǵat 12-de Óndiris jáne Kóktal kentterinde halyq serýeni men merekelik kontsert bolady.

22 naýryzda kúni boıy elordanyń barlyq oıyn-saýyq oryndarynda merekelik qoıylymdar, spektaklder, utystar men lotereıalar ótkiziledi.

Naýryz meıramy saǵat 22,30-da Esil jaǵasynda merekelik otshashýmen aıaqtalady.