Elordada Naýryz merekesiniń qurmetine halyqtyq serýen ótip jatyr
ASTANA. QazAqparat - Qala ákimdiginiń aldyndaǵy alańda Naýryz merekesiniń qurmetine halyqtyq serýen ótip jatyr. Mereke kúni kontsertten bastaldy. Kórermender nazaryna ulttyq bıler, orkestr jáne teatrlandyrylǵan qoıylymdar usynyldy. Sondaı-aq, túrli ult ókilderi ózderiniń ulttyq ánderi men bılerin oryndady.
Bul týraly ákimdiktiń resmı saıtynda habarlandy. Kontsertten bólek, alańda merekelik baıqaýlar men saıystar uıymdastyrylýda. Bunda kez kelgen adam baǵyn synaı alady.
Sonymen birge, Naýryz merekesi kúnderi «Astana EKSPO - 2017» Ulttyq kompanııasy halyqtyq serýender uıymdastyrýǵa at salysýda. Búgin qala turǵyndary men qonaqtary halyqaralyq mamandandyrylǵan kórme týraly qyzyqty málimettermen tanysýǵa múmkindik aldy. Kórme nysandarynyń qurylys qarqynymen jáne oladyń daıyndyǵy týraly beınerolıkter kórsetiledi.
«Astana EKSPO - 2017» ulttyq kompanııasy basqarma dırektorynyń aıtýynsha, «Bolashaq energııasy» taqyrybynda ótetin kórme barshaǵa qoljetimdi energııanyń damýyna jol ashatyn jahandyq trend bolyp tabylady.
«EKSPO-nyń taqyryby biregeı jáne ol osy taqyryptardyń damýyna zor úles qosa alady. Naýryzda jańashyldyq, jasampazdyq, beıbitshilik tileımiz. Qazaqstan osy joba arqyly aldaǵy myńjyldyqtarda adamzattyń damýyna zor úles qosady degim keledi», - deıdi «Astana EKSPO - 2017» UK» AQ basqarma dırektory Saltanat Rahymbekova.
Qalalyq alańdaǵy kıiz úılerde kez kelgen adam qazaqtyń ulttyq taǵamdarynan dám tata alady.
