Elordada Naýryz meıramyna arnalǵan ulttyq oıyndar men sporttyq sharalar bastaldy
ASTANA. KAZINFORM – Astanada 21 naýryz kúni tańerteńnen bastap Naýryz meıramyna arnalǵan keń kólemdi merekelik sharalar uıymdastyryldy. Qala turǵyndary elordanyń basty alańdaryna – qalalyq alańda, «Qazaq eli» monýmenti mańynda, «Astana Arena» stadıonynda, «Atatúrik» saıabaǵynda, Astana Music Hall avtoturaǵynda jáne EXPO aýmaǵynda bas qosyp, sporttyq is-sharalarǵa belsendi qatysyp jatyr. Olardyń qatarynda qazaq halqynyń baıyrǵy ulttyq oıyndarynan jarystar da ótip jatyr, dep habarlaıdy elorda ákimdiginiń resmı saıty.
Tańǵy saǵat 10:00-den bastap alańdarǵa jınalǵan elordalyq turǵyndar men qala qonaqtary túrli sporttyq is-sharalarǵa belsendi qatysyp jatyr.
Ulttyq sporttyq sharalardy kórýge jáne qoldaýǵa Astana qalasynyń Dene shynyqtyrý jáne sport basqarmasynyń basshysy Vasılıı Levıt arnaıy kelip, jasandy ıntellekt múmkindikterimen tanysyp, tehnologııa men ulttyq oıyndardyń úılesimin qala turǵyndarymen birge tamashalady.
Mysaly, Esil aýdanyndaǵy EXPO aýmaǵynda jasandy ıntellekt kómegimen dástúrli sadaq atý, toǵyzqumalaq jáne qoshqar kóterý sııaqty ulttyq oıyndar uıymdastyrylǵan.
– Búgin Naýryz meıramyn toılaýdy keń kólemde bastap kettik. Sonyń ishinde eki kún boıy ulttyq oıyndarymyz qalanyń 6 aýdanynda 30-ǵa jýyq jerde ótýde. Naqtyraq aıtqanda, búgin qalamyzdyń 13 jerinde ótse, erteń 12 jerde ulttyq oıyndardan jarystar uıymdastyrylady. Ásirese qalanyń shet aımaqtarynda da ulttyq oıyndar ótip jatyr. Barshańyzdy shaqyramyz, kelińizder, - dedi Astana qalasynyń Dene shynyqtyrý jáne sport basqarmasynyń basshysy Vasılıı Levıt.
Aıta keteıik, erteń, ıaǵnı 22 naýryz kúni de ulttyq oıyndardan jarystar ótedi. Qatysý tegin.
Buǵan deıin habarlaǵanymyzdaı, Astanada júzdegen adam erekshe ınstallıatsııa qurastyryp shyqty.
