Elordada N.Úsenbaevanyń Naýryz meıramyna arnalǵan kontserti ótti
STANA. Naýryzdyń 26-sy. QazAqparat /Gúlmıra Álıakparova/ - Keshe keshqurym Astanadaǵy Kongress-Holl saraıynda Qazaqstannyń opera ánshisi Nurjamal Úsenbaevanyń «Qýanamyn» atty jeke kontserti ótti,
dep habarlaıdy QazAqparat.
Qazaqstan jáne Tatarstan respýblıkalarynyń halyq ártisi, birqatar Memlekettik jáne Táýelsiz «Platınaly Tarlan» syılyqtarynyń ıegeri N.Úsenbaeva, óziniń shyǵarmashylyq keshin Naýryz meıramyna arnady.
«Naýryz aıynda bútin qazaq jurtyna amandyq, al táýelsiz elimizge ashyq aspan tileımin. Meniń ákem ne isteseń de ony bar yntańmen, shyn peıilińmen qýanyp iste deıtin. Ómirdiń árbir sátine qýana bilý mańyzdy. Kontserttiń «Qýanamyn» dep atalýy da osy sebepti», - deıdi ol.
Kontsert Astana qalasy Memlekettik fılarmonııasynyń Qazaq ulttyq halyq aspaptar orkestriniń súıemeldeýimen ótti. Orkestrdiń kórkemdik jetekshisi jáne bas dırıjeri, Qazaqstan Respýblıkasyna eńbek sińirgen qaıratker Aıtqalı Jaıymov.
N.Úsenbaevanyń oryndaýynda Ybyraıdyń «Gákký», A.Jubanov pen L.Hamıdıdiń «Abaı» operasynan Ajardyń arııasy, «Dedimaı-aý», «Daıdıdaý», «Alqońyr» jáne taǵy basqa halyq ánderi, Sh.Qaldaıaqovtyń «Qaıyqta», «Arys jaǵasynda», L.Ardıtıdiń «Súıis», I.Shtraýstyń «Jarqanat» operetasynan úzindi, barlyǵy 15-ke jýyq án shyrqaldy.
