Elordada «Mýzeıdegi tún» aktsııasy qalaı ótýde

NUR-SULTAN. QazAqparat - Jyl saıynǵy dástúr boıynsha búgin Ulttyq mýzeıde Halyqaralyq mýzeıler kúnin merekeleý aıasynda «Mýzeıdegi tún» aktsııasy ótip jatyr. Koronavırýs ınfektsııasynyń taralýyna baılanysty shara ekinshi jyl qatarynan onlaın rejımde ótýde, dep habarlaıdy QazAqparat tilshisi.

Bıylǵy aktsııanyń taqyryby «Mýzeılerdiń bolashaǵy: qalpyna keltirý jáne jańartý» boldy. Onlaın shara tańǵy 10-da bastalyp, keshki 6-ǵa deıin jalǵasady.

«Qurmetti dostar! Barlyǵyn búgingi keremet mereke - Halyqaralyq mýzeıler kúnimen quttyqtaımyn. Bul mereke bizdiń elimizde ǵana emes, álemdegi barlyq mýzeıde jyl saıyn atap ótiledi. Bıyl «Mýzeıdegń tún» aktsııasy onlaın formatta ótýde. Aktsııa ulttyq qundylyqtardy, tarıhymyzdy, halqymyzdyń salt-dástúrleri men murajaı isin nasıhattaýǵa baǵyttalǵan. Búgingi aktsııa arnaıy daıyndalǵan derekti fılmdermen jalǵasady», - dedi Qazaqstan Respýblıkasy Ulttyq mýzeıiniń dırektory Arystanbek Muhamedıuly.

Mýzeı qyzmetkerleri kórermender úshin kórme men kórme zaldaryna onlaın týr uıymdastyryp, qazaq halqynyń materıaldyq jáne materıaldyq emes mádenıetiniń ejelgi qorymdary men qundylyqtarynyń tarıhyn aıtty. Atap aıtqanda, Qazaq handyǵynyń qurylǵanyna 550 jyl tolýyna oraı jazylǵan «Máńgilik el» atty kartınalardyń trıptıhi kórermen nazaryna usynyldy. Bul sýretter Qazaq handyǵynyń qurylý protsesi, memleket tarıhy týraly baıandaıdy. Sýretterdiń biri Qazaqstan Respýblıkasynyń Tuńǵysh Prezıdenti - Elbasy Nursultan Nazarbaevqa arnalǵan.

Ózderińiz biletindeı, 2020 jyl uly Abaıdyń 175 jyldyǵyn toılaý jyly bolyp jarııalandy. Onlaın-týr kezinde olar uly aqynnyń shyǵarmalary ornalasqan zaldy da kórsetti.

Joǵaryda aıtylǵandardan basqa, tyńdaýshylarǵa ejelgi dáýirden qalǵan qundy jádigerler týraly aıtyldy. Ekskýrsovod ǵalymdardyń, tarıhshylardyń arheologııalyq oljalary, «Tobyl oıshyly» músini, altynnan jasalǵan buıymdar, kúmis tostaǵan, jáne asqa da qundy aqparat aıtty.