Elordada «Mýzeı túni» aktsııasy ótedi
NUR-SULTAN. QazAqparat - Jyldaǵy qalyptasqan dástúr boıynsha 2019 jyldyń 18 mamyrynda saǵat 18:00-24:00 aralyǵynda elordada «Mýzeıler túni» aktsııasy ótedi. Bul týraly «Qazaqstan Respýblıkasynyń Ulttyq Mýzeıi» baspasóz qyzmeti málim etti, dep habarlaıdy QazAqparat.
Baspasóz málimetterine qaraǵanda, bıylǵy aktsııa Qazaqstan Respýblıkasy Ulttyq mýzeıiniń 5 jyldyǵyna oraı jáne Halyqaralyq mýzeı kúni merekesine arnalyp, «Bes jyl birge» degen taqyrypen úıymdastyrylmaq. Aktsııaǵa kelgen astanalyqtar men qala qonaqtary Ulttyq mýzeıge tegin kirip, túrli sharalardy tamashalaı alady.
Sharanyń maqsaty - ulttyq kodqa negiz bolatyn ulttyq qundylyqtardy, halqymyzdyń tarıhyn, mádenıetin, salt-dástúrin zamanaýı formatta tanytyp, murajaı qyzmetin, ondaǵy eksponattar men jaýhar jádigerlerdi keńinen nasıhattaý.
Halyqaralyq mýzeı kúni merekesi 1977 jyly Halyqaralyq mýzeıler keńesiniń Bas konferentsııasynda bekitilgen. Atalǵan dataǵa oraı 1997 jyly tuńǵysh ret «Mýzeı túni» sharasy Berlın qalasynda ótkizildi.
«Mýzeıler túni» aktsııasy QR Ulttyq mýzeıinde jyl saıyn dástúrli túrde uıymdastyrylyp keledi. Atalǵan shara osyǵan deıin 5 márte uıymdastyryldy. 2015 jylǵy alǵashqy aktsııaǵa 23 myń adam qatyssa, 2016 jylǵy 18 mamyr kúni Ulttyq mýzeıge 30 myńnan astam adam kelgen. 2017 jyly atalǵan aktsııa 2 ret ótkizildi. Onyń alǵashqysy «Naýryz» merekesine oraı «Naýryz - jańǵyrý nyshany» degen taqyryppen uıymdastyrylyp, Halyqaralyq mýzeıler kúnine arnaldy.
Murajaı qonaqtary Ulttyq mýzeıdiń 5 jyldyǵyna oraı, mýzeı qorynan jańa eksponattarmen tolyqtyrylǵan Etnografııa zaly men jańa ashylǵan «Asyl mura» zaldaryn tamashalaı alady.
2015 jylǵy 18 naýryzda qorlardy tolyqtyrý maqsatymen «Ulttyq mýzeıge syı tartý» aktsııasy qolǵa alynǵan bolatyn. Kórnekti qoǵam jáne saıasat qaıratkerleriniń, Uly Otan soǵysy ardagerleriniń urpaqtary jáne jeke kollektsııanerler mýzeıge tarıhı jáne mádenı qundylyǵy bar zattardy syıǵa tartyp, mýzeı qorlary túrli qundy jádigerlermen tolyqqan. Osy eksponattar «Asyl mura» zalyna usynylyp, qarý-jaraq pen kilem toptamalary, memleket jáne saıasat qaıratkeri I.Tasmaǵambetovtyń kollektsııasynan zergerlik áshekeıler, áıelder men erlerdiń beldikteri, at ábzelderi jáne B. Sarbaevtyń kollektsııasynan álem halyqtarynyń mýzykalyq aspaptary syndy jeke kollektsııalardan baǵaly buıymdar qoıyldy.
«Mýzeıler túni» aktsııasy barysynda respýblıkalyq «Egemen Qazaqstan» gazetiniń 100 jyldyǵyna oraı «Júz jyldyq jylnama» kórmesi saltanatty túrde ashylady.
Sonymen qatar shara baǵdarlamasynda aqyn Dáýletkereı Kápulynyń bastamasymen «Aqshamdaǵy aqyndar jyry» atty shyǵarmashylyq kesh, ónertanýshy, sýretshi E.N. Chernovanyń «Qazaqstannyń qoldanbaly sándik óneri: Keshe jáne búgin» atty sheberlik dárisi, «Qusnı qorlan» kórinisi, músinshi Aıdos Esmaǵanbetpen maskalar shoýy, art pazl qurastyrý, qolóner jumystary boıynsha sheberlik sabaqtar, «Tarıh syry», «Mýzeı bilgiri» vıktorınalyq suraqtar, kitap jármeńkesi uıymdastyrylyp, «Toǵyzqumalaq», «Asyq atý», t.b. qazaqtyń ulttyq oıyndary oınatylady.
