Elordada mýzeı túni ótedi
ASTANA. KAZINFORM — 18 mamyrda saǵat 18:00–den túngi 00:00–ge deıin Ulttyq mýzeıde halyqaralyq mýzeı kúnine arnalǵan dástúrli «Mýzeı túni — 2025» mádenı-tanymdyq aktsııasy uıymdastyrylady.
Іs-sharanyń maqsaty — rýhanı-mádenı qundylyqtardy, halqymyzdyń tarıhyn, mádenıetin bir keńistikke biriktire otyryp, ár túrli janr men stıldegi óner týyndylaryn usyný, mýzeı qyzmetin, ondaǵy eksponattar men jádigerlerdi keńinen nasıhattaý.
Ótken men búginniń, dástúr men jańashyldyqtyń, tarıh pen zamanaýı mádenıettiń toǵysynan quralǵan bul kesh mazmuny men formasy jaǵynan erekshe ári jańashyl baǵdarlamasymen erekshelenedi. Mýzeı keńistigi túrli ınteraktıvterge, tanymdyq ekskýrsııalarǵa, kreatıvti sheberlik sabaqtaryna, ǵylymı dáristerge, kórkem performanstarmen, ár jastaǵy aýdıtorııaǵa arnalǵan mádenı sharalarmen jáne kontserttik qoıylymdarmen tolyǵady.
Baǵdarlama barysynda Ulttyq mýzeıdiń jobalary aıasyndaǵy mektep jasyna deıingi balalarǵa arnalǵan «Baldyrǵan gıd» jobasy, «Mıras» úıirmesiniń ekskýrsııalary jáne «Kúmis jas» jobasy sheńberindegi belsendi uzaq ómir súrý ortalyǵynyń qatysýymen ótetin ekskýrsııalar uıymdastyrylady. «Jádigerler sóıleıdi» teatrlandyrylǵan ekskýrsııa aıasynda Altyn adam men ejelgi hanshaıymdardyń beınesindegi keıipkerler kórermendi tarıhı álemge jeteleıdi.
Sondaı-aq, kelýshiler úshin ejelgi áýenderdi zamanaýı rıtmdermen biriktirip, qazaq mádenıetiniń atmosferasyna tolyqtaı boılaýǵa múmkindik beretin «Dala áýenderi» atty etno-DJ-set jáne tanymal telejúrgizýshiler qatysatyn «Juldyzdy gıd» shoý-jobasy uıymdastyrylady.
XVIII–XIX ǵasyrdyń sheteldik grafıkalyq óner sheberleri jasaǵan gravıýra óneri týyndylary arqyly Qazaqstannyń tarıhı-mádenı murasynyń biregeıligin kórsetetin «Uly dala. Tarıh. Gravıýra» kórmesi, sondaı-aq Ulttyq mýzeı qoryndaǵy qundy jádigerler negizinde jasaqtalǵan «Asyl mura» kórmesi ashylyp, halqymyzdyń rýhanı-mádenı qazynasyn keńinen tanystyrýǵa jol ashady.
«Qolónershiler jármeńkesi» men zergerlik buıymdar, keramıka, mata, kilem jáne kıiz buıymdaryn qalpyna keltirý boıynsha sheberlik sabaqtary ótkizilip, kelýshiler dástúrli qolónerdiń názik qyrlarymen tanysa alady. «Ónerge qol jetkizý» sheberlik saǵaty arqyly mýzeı qonaqtary beıneleý óneriniń qyr-syrymen jaqyn tanysýǵa múmkindik alady.
«Dana» jobasy aıasynda uıymdastyrylatyn «Jan bitken jádigerler» kvest-sabaǵy men «Mýzeıdegi tún» kvest-oıyny kelýshilerge eksponattarmen ózara árekettese otyryp, tarıhı jumbaqtardy sheshý, óner men mádenıetke jańasha kózqaraspen qaraý múmkindigin usynady.
Keshtiń mádenı baǵdarlamasy sımfonııalyq jáne úrmeli aspaptar orkestriniń, tsırk ártisteri men bı ansambliniń qatysýymen ótetin áserli kontsertpen jalǵasady. Kontserttik baǵdarlama aıasynda Erkeǵalı Rahmadıev atyndaǵy Memlekettik akademııalyq fılarmonııanyń sımfonııalyq jáne úrmeli aspaptar orkestri, Astana qalasy ákimdigi Mádenıet basqarmasyna birlesken murajaılar dırektsııasyna qarasty Ulttyq óner murajaı bólimi jáne «Joshy Qazaq National Group» etno-folklorlyq ansambli, Roza Baǵlanova atyndaǵy «Qazaqkontsert» memlekettik akademııalyq kontserttik uıymynyń «Gúlder» ansambli óz ónerlerin usynady.
Eske salaıyq, «Mýzeı túni» aktsııasy Ulttyq mýzeıde jyl saıyn ótetin mádenı shara. 2015 jyly ótken alǵashqy sharaǵa 23 myń adam qatyssa, 2016 jylǵy 18 mamyr kúni Ulttyq mýzeıge 30 myńnan astam adam kelgen. 2017 jyly atalǵan aktsııa 2 ret ótkizilip, 39 myńnan asa adam keldi. Onyń alǵashqysy Naýryz merekesine oraı uıymdastyrylsa, ekinshisi Halyqaralyq mýzeıler kúnine arnaldy. 2018 jyly 37 myńnan asa adam, al 2019 jyly 42 myńnan asa adam keldi. Keıingi jyldary elimizde oryn alǵan karantın jaǵdaıyna baılanysty atalǵan shara mýzeıdiń áleýmettik jelidegi paraqshalary arqyly onlaın formatta júzege asty. 2023 jyly sharaǵa kelýshiler sany 48 myńǵa, 2024 jyly 30 myńnan asa kelýshilermen tolyqty.
Aıta keteıik, is-shara Mádenıet jáne aqparat mınıstrligi men Astana qalasy ákimdiginiń qoldaýymen uıymdastyrylady.
17-18 mamyr kúnderi Almatyda da «Mýzeı túni» ótedi.