Elordada mýzeı túni aktsııasy ótip jatyr
ASTANA. KAZINFORM – Elordadaǵy Ulttyq mýzeıde «Mýzeı túni» aktsııasy ótip jatyr. Mádenı is-shara Halyqaralyq mýzeı kúnine arnalǵan.
Іs-sharanyń ashylý rásimine qatysqan Mádenıet jáne aqparat mınıstrliginiń Mádenıet komıteti tóraǵasynyń orynbasary Sábıt Barlybaev Ulttyq mýzeı qyzmetkerleri men jınalǵan qaýymdy Halyqaralyq mýzeı ári aldaǵy ýaqytta ótetin mádenıet jáne óner qyzmetkerleri kúni merekelerimen quttyqtady.
«Barlyǵyńyzdy osynaý merekemen – Halyqaralyq mýzeı kúnimen shyn júrekten quttyqtaımyn. Jalpy, bul mereke jyl saıyn mádenıetimiz ben tarıhymyzdyń ortylyǵy sanalatyn elimizdiń basty mýzeıi – Ulttyq mýzeıde ótkizilip keledi. Búginde mýzeı tek qana mádenıet nysany ǵana emes, sonymen birge bilim men ǵylym ortalyǵyna aınalyp otyrǵanyn atap ótken jón. Ol jas býynnyń boıyna bilim men shyǵarmashylyqqa degen súıisenshilik dánegin sebedi. Sol sebepti búgingi is-sharanyń mańyzy qoǵam úshin óte zor», - dedi Sábıt Barlybaev.
Qazirgi ýaqytta mýzeıge óte kóp adam jınalǵan, kópshiligi otbasymen kelgen. Olarǵa «Astana sazy» Qazaq memlekettik folklorlyq ansambli, «Qazaqkontsert» memlekettik kontsert uıymy ártisteriniń qatysýymen kontserttik baǵdarlama uıymdastyryldy.
Mýzeı qonaqtaryna qolónershiler jármeńkesi, «Dala keskindemesi: rámizder, boıaýlar, beıneler» men «Erlikke taǵzym – eldiktiń belgisi» kórmeleri, Ulttyq mýzeıdiń Konservatsııa jáne qalpyna keltirý qyzmetiniń sheberlik sabaqtary, «Mýzeı qoryndaǵy ataqty tulǵalar dombyrasynyń únin jańǵyrtý» atty lektsııa-kontsert pash etildi. Sonymen qatar teatrlandyrylǵan ekskýrsııa, «Juldyzdy gıd. 10 juldyz. 10 jaýhar» shoý-jobasy da kórermen kóńilinen shyǵyp jatyr.
«Shynymen aıtsam, mundaı is-sharaǵa alǵash ret kýá bolyp otyrmyn. Burynyraq estigenmin, teledıdardan da kórgen edim. Al osy jerge kelip, mádenı is-sharany óz kózińmen kórý sezimi bólek eken. Iá, ádette mýzeıde mundaı kóp adam bola bermeıdi. jazdy jaıma shýaq kúnindegi mundaı mereke kóńilimizden shyǵyp jatyr. Mýzeıde ýaqytyńdy kóńildi ári paıdaly ótkizýge bolady eken», - dedi «Mýzeı túni» aktsııasyn alǵash ret kelgen Anar Bekjanova.
Aıta keteıik, is-sharanyń maqsaty – rýhanı-mádenı qundylyqtardy, halqymyzdyń tarıhyn, mádenıetin bir keńistikke biriktire otyryp, ár túrli janr men stıldegi óner týyndylaryn usyný. Mýzeı qyzmetin, ondaǵy eksponattar men jádigerlerdi keńinen nasıhattaý.
Bul kúni tańǵy saǵat 10:00-nan bastap «Baldyrǵan gıd» sholý ekskýrsııalary, Ulttyq mýzeıdiń ǵylymı jobalar aıasynda jaryq kórgen kitaptardyń tusaýkeseri, kartına men músin týyndylaryna kóshirme jasaýdan sheberlik synyby men Ulttyq mýzeıdiń jobalary aıasyndaǵy mýzeılik sabaqtar ótken bolatyn. Atalǵan mádenı is-shara Ulttyq mýzeıde dástúrli túrde uıymdastyrylyp keledi. Ótken jyly kelýshiler sany 48 myńǵa jýyqtady.
Esterińizge sala keteıik, «Halyqaralyq mýzeı kúni» merekesi 1977 jyly halyqaralyq mýzeıler keńesiniń bas konferentsııasynda bekitilgen. Sol jyly alǵashqy «Mýzeı túni» is-sharasy Berlın qalasynda ótti.
