Elordada múgedekterge arnalǵan jańa qurylǵylar tanystyryldy
NUR-SULTAN. QazAqparat – Nazarbaev ýnıversıtetinde múmkindigi shekteýli jandarǵa arnalǵan jańa qurylǵylar tanystyryldy, dep habarlaıdy QazAqparat tilshisi.
Jańa prototıpter «Astana jastary» jastar resýrstyq ortalyǵy, «Tel-Avıv ýnıversıtetiniń Qazaqstandaǵy dostary» ZTB jáne Nazarbaev ýnıversıteti uıymdastyrǵan «PostTOM» meıkatondar qorytyndysynda (72 saǵatta máseleniń sheshimin tabý) kórsetildi.
«Meıkatonnyń birneshe kezeńi ótti. Birinshi kezeńde múmkindigi shekteýli jandar jınalyp, kúndelikti ómirde kezdesetin qıyndyqtar týraly aıtady. Sonyń nátıjesinde ınjenerler, IT mamandary, ońaltý mamandary ýnıversıtet alańynda óz jobalaryn júzege asyrý arqyly kómektese alady. Olar bir ýaqytty belgilep, jospar qurady da, bir aıdan keıin úsh táýlikte (72 saǵat) oılaǵan jospardy júzege asyrady. Uıymdastyrýshylar jobaǵa qajetti barlyq materıaldarmen qamtamasyz etedi. Al qatysýshylar úsh kúnde daıyn prototıp usynýy tıis. Eger komandalar ári qaraı prototıpten ónim jasaǵysy kelse, barlyǵy «PostTOM» sharasyna jınalýy tıis. Búgingi jıynda sońǵy 2 jyldyń nátıjesin kórsetip, memlekettik organdarǵa, ýnıversıtetter men aýrýhanalarǵa, ońaltý ortalyqtaryna jańa dúnıelerdi tanystyrǵymyz keledi, múmkindigi shekteýli jandardyń máselelerin aıtqymyz keledi», - dedi «Tel-Avıv ýnıversıtetiniń Qazaqstandaǵy dostary» ZTB vıtse-prezıdenti, shara uıymdastyrýshysy Sánııa Arapova.
Meıkaton qatysýshylary arasynda №37 fızıka-tehnıkalyq lıtseıdiń oqýshylary Álıhan Rahmetov pen Ámirjan Dýlatov bar.
«Biz múgedekter arbasyn avtomattandyrýǵa arnalǵan ámbebap qurylǵy jasadyq. Ony «RemoteXY» mobıldi qosymshasy arqyly kez kelgen arbaǵa qosyp, esh symsyz basqarýǵa bolady», - dedi olar.
Sonymen birge, Qaraǵandy medıtsınalyq ýnıversıtetinen kelgen Pavel Ivachev te óz jobasyn tanystyrdy.
«bizdiń komanda 2017 jyly quryldy jáne bizdiń komandalasymyz eski úıde turatynyn jáne úshinshi qabatqa arbamen kóterile almaıtynyn aıtty. Osylaısha, mobıldi-baspaldaq kótergishin jasap shyǵardyq. Akkýmýlıatordy qýattap alǵan soń, bul qurylǵyǵa arbany qoıyp, baspaldaqta ońaı qozǵalýǵa bolady. Bul qurylǵy 100 kelige deıingi salmaqty kóteredi», - dedi Pavel Ivachev.
