Elordada múgedek balanyń anasyn avtobýsqa otyrǵyzbaı qoıǵan júrgizýshi jumystan ketti
NUR-SULTAN. QazAqparat - Nur-Sultan qalasynda múgedek balany avtobýsqa otyrǵyzyp, onyń anasyn almaı ketken qoǵamdyq kólik júrgizýshisi jazaǵa tartyldy, dep habarlaıdy QazAqparat tilshisi.
«№1 avtobýs parki keńesiniń tártiptik qorytyndysyna sáıkes, 2021 jylǵy 11 qańtar kúni №60 avtobýstyń júrgizýshisi jolaýshylardy tasymaldaý týraly erejeni saqtamaǵan. Ony avtobýs salonynda túsirilgen vıdeojazba dáleldep otyr. Avtobýs júrgizýshisinen jazbasha túsinikteme alyndy. Avtobýs parki keńesiniń sheshimine sáıkes, búginde tártipti buzǵan júrgizýshimen eńbek kelisimsharty úzildi. Bolǵan oqıǵa qaıtalanbaý maqsatynda barlyq avtobýs júrgizýshiler quramy jolaýshylardy qoǵamdyq kólikke otyrǵyzý jáne odan túsirý erejesimen qaıta tanystyryldy», - dedi CTS (City Transportation Systems) JShS-niń baspasóz hatshysy Oksana Loskýtova.
Onyń aıtýynsha, júrgizýshi jumystan qýylýymen qatar, oǵan aıyppul da salyndy.
«Nur-Sultan qalasy Ákimshilik polıtsııa basqarmasy QR Ákimshilik quqyqbuzýshylyq kodeksiniń №593 babyna sáıkes qoǵamdyq kólik júrgizýshisine 5 AEK kóleminde aıyppul saldy. Óz kezeginde №1 elordalyq avtobýs parki ákimshiligi júrgizýshiniń beıádep áreketi úshin keshirim suraıdy», - deıdi ol.
Eske sala ketsek, osydan birer kún buryn elorda turǵyny qoǵamdyq kólikke múgedek balany otyrǵyzyp, onyń anasyn tastap ketkeni týraly Facebook paraqshasynda jazǵan bolatyn.
