Elordada múgedek balalardyń em qabyldaýyna kómek kórsetý boıynsha qarjy bólindi

«Ákimdik tarapynan bundaı dástúrli kómek múgedek balalary bar otbasylar úshin úlken qoldaý. Óıtkeni, osyndaı otbasylar kóbinese ózderi qomaqty qarjy bólip, balalaryn emdeı almaıdy. Osyndaı kómek jasalyp jatqanyna 5 jylǵa jýyq ýaqyt boldy»,-dedi Astana qalasy múgedek balalar qoǵamynyń tóraıymy Qamqa Jasanova.

Belgili bolǵandaı, búgin ákimdikte 25 balaǵa kómek kórsetý boıynsha 15,5 mln. teńge kóleminde qarjy tapsyryldy. Bul jetkinshekterdi irikteýge arnaıy komıssııa qatysyp, ata-analarynyń jazǵan ótinishi boıynsha komıssııa tarapynan tıisti sheshim jasalady.

Onyń aıtýynsha, múgedek balalar Qazaqstanda jáne shetelderge baryp em qabyldaıdy.

«Bizdiń qoǵamda 600-ge jýyq bala tirkelgen. Sonyń ishinde emdi dereý qajet etetin 65 bala tizimge engizildi»,-dedi ol.

Aıta keteıik, 2008 jyly ákimdiktiń bastamasy boıynsha «Báıterek» qaıyrymdylyq qory qurylyp, onyń esep-shotyna qaırymdylyq aktsııalary kezinde túsken qarjy aýdarylyp otyrady. Máselen, 2012 jyly Astana kúnin merekeleý aıasyndaǵy sharalarǵa bıletterdi satýdan 20 mln. teńgeden astam qarjy jınaldy.