Elordada muǵalimderge arnalǵan alleıa paıda boldy
«Aýa-raıy qubylmaly elordada jasyl beldeý men ekologııalyq aımaqtar ekologııany jaqsartyp qana qoımaı, klımattyq jaǵdaıdy jumsartýǵa múmkindik beredi. Kóktemde jáne kúzde qalanyń barlyq aýdandarynda aǵash otyrǵyzýmen aınalysamyz. Saıabaqtarǵa, qoǵamdyq keńistikterge jáne aýlaishilik aýmaqtarǵa erekshe nazar aýdaramyz. Búgin halyq arasynda Pıramıda dep atalatyn Beıbitshilik jáne kelisim saraıynyń boıyndaǵy Tuńǵysh Prezıdent saıabaǵynda aǵashtar otyrǵyzyldy. Sharaǵa eriktiler, qoǵam qaıratkerleri, mádenıet jáne sport qaıratkerleri, qala turǵyndary qatysty. Ustazdar kúni merekesine oraı muǵalimderimizge arnap arnaıy alleıa otyrǵyzdyq», -dedi qala ákimi jelidegi paraqshasyndaǵy jazbasynda .
Qalada tek osy demalys kúnderi myńǵa jýyq aǵash otyrǵyzylǵan.
«Bıyl otyrǵyzylǵan aǵashtardyń jalpy sany 30 myńnan, jasyl jelekter – 80 myńnan asady. Osylaısha, qalada birtindep jasyl araldar - ekologııalyq aımaqtar sanyn kóbeıtýdemiz. Ósimdikterdi saqtaý maqsatynda aǵashtardy kesý kezinde ótemdik otyrǵyzýdy eki ese kóbeıttik. Eger buryn «beske bir» bolsa, qazir «onǵa bir».Karantın kezinde 15 myńnan astam jumys ornyn ashýǵa múmkindik bergen «Jumyspen qamtýdyń jol kartasy» baǵdarlamasy boıynsha birqatar mádenıet, sport jáne bilim berý nysandaryn jóndeýge kiristik. Qazir Beıbitshilik jáne kelisim saraıyna jóndeý jumystaryn júrgizip jatyrmyz. Búgingi tańda ǵımarat boıymen otyrǵyzylǵan aǵashtar qazirdiń ózinde bul jerge jaılylyq berip tur. Birneshe jyldan keıin osy aımaqta qurylǵan ekologııalyq aımaqtar birneshe ese kóp bolady», - dep tolyqtyrdy ákim.